اسپیکر قومی اسمبلی اسد قیصر بین الپارلیمانی یونین نا ایشیا پیسفک گروپ نا کماشی نا اسہ سال ءِ پورو کرے، صدارت فلپائن ءِ گدریفنگ

بلغراد ۔ 14اکتوبر (اے پی پی) اسپیکر قومی اسمبلی اسد قیصر بین الپارلیمانی یونین نا ایشیاء پیسفک گروپ نا کماشی ءِ کننگ نا اسہ سال ءِ پورو کرینے، اوکان پد گروپ نا کماشی ءِ فلپائن نا پارلیمنٹ نا اسپیکر آ گدریفنگانے ہرا دا منصب آ اسہ سال اسکان تینا فرض ءِ سرانجام ایتک ۔ قومی اسمبلی سیکرٹریٹ نا رداٹ بین الپارلیمانی یونین نا جنرل اسمبلی نا دیوان بلغراد اٹی برجاءِ ۔ اسپیکر قومی اسمبلی اسد قیصر گروپ نا اسہ سال اسکان صدر مس ۔ دا عہدہ نا مدانا پوروی آ اونا جاگہ غا فلپائنی پارلیمنٹ نا اسپیکر ءِ اسہ سال اکن زمورای تے تننگانے ۔ ایشیاء پیسفک گروپ نا باسک پارلیمان تا اسپیکرز اسد قیصر ءِ گروپ نا معاملہ غاتے جوان وڑاٹ چلیفنگ آ خراج تحسین پیش کرے ۔ کماشی ءِ گدریفنگ ایشیاء پیسفک گروپ نا 13اکتوبر آ اڈ ہلوک آ دیوان اٹی کننگا ۔ ایشیاء پیسفک گروپ اٹی چین، جاپان ، فلپائن ، ملائیشیا ، آسٹریلیا ، کینیڈا ، نیوزی لینڈ و ایلو باسک ملک آک اوارءُ ۔ جہانی پارلیمانی یونین نا 141می دیوان سربیا نا دارالحکومت بلغراد اٹی برجاءِ ۔