پاکستان علماء کونسل ہچ ءُ دھرنا یا مارچ اسے ٹی بشخ ہلپک، حافظ طاہر اشرفی

اسلام آباد ۔ 14اکتوبر (اے پی پی) پاکستان علماء کونسل نا چیئرمین حافظ محمد طاہر محمود اشرفی پارینے کہ پاکستان علماء کونسل ہچ ءُ دھرنا یا مارچ اسے ٹی بشخ ہلپک، حکومت و مولانا فضل الرحمان مفاہمت اٹ معاملہ غاتے ایسر کیر، ملک اٹی بے چیٹی و پھسات تالان کننگ نا چم آتے سرسہب مننگ کن الیپنہ ۔ دوشنبے نادے آجاری بیان اٹی اوپارے کہ جمعتہ المبارک نا اجتماع تیٹی مظلوم کشمیری تتون یکجہتی نا دے انا وڑاٹ اڈتننگک ، مچ آ قوم کشمیری ایلم تتون ہم کوپہ سلوک ءِ ۔ اوپارے کہ پاکستان علماء کونسل ملک اٹی جنگ و جھیڑہ، بیدادی و پھسات نا سیاست خواپک ، کونسل فیصلہ کرینے کہ نن ہچ ءُ مارچ یا دھرنا سے ٹی بشخ الپنہ ۔ اوپارے کہ حزب اختلاف و حزب اقتدار ویل آتے مذاکرات اٹ ایسر کننگ کن کوشست کیر ۔ اوپارے کہ آزادی مارچ نا سوب آن تبلیغی اجتماعی ٹی بروک آ بشخ ہلوک آتے ہم مشکلات آتون مون تروئی تمک ہراڑان اجتماع نا زہمی مننگ نا گڑتی ءِ ۔ اوپارے کہ ماہ ربیع الاول و ربیع الثانی ءِ مچ آ ملک اٹی ماہ رحمت اللعالمین صلی اللہ علیہ وسلم نا وڑاٹ اڈایتنہ ۔ طاہر اشرفی پارے کہ کونسل نا تدوک آدے مروک آ دیوان اٹی وزیراعظم پاکستان عمران خان و سپہ سالار قوم جنرل قمر جاوید باجوہ نا کنڈآن مسلم ملک آتا نیام اٹ خیر خواہی کرفنگ نا کوشست آتا ستاءِ کننگا و سعودی عرب نا آئل تنصیب آتیا جلہو نا مذمت ءِ کننگا ۔