وزیراعظم نا وژن ءِ مون آ تخسا ترتیب تروک آ پروگرام ورناتا شونداری کن مزل نا نشان مریک، عثمان ڈار

اسلام آباد ۔ 14اکتوبر (اے پی پی) وزیراعظم نا خصوصی کمکار امور نوجوانان عثمان ڈار پارٹی نا مرکزی سیکرٹریٹ نا دورہ ءِ کرے و پاکستان تحریک انصاف نا چیف آرگنائزر سیف اللہ خان نیازی تون خصوصی اوڑدہی کرے ۔ مرکزی میڈیا ڈیپارٹمنٹ نا کنڈآن دوشنبے نادے آ داڑے جاری بیان نا رداٹ وزیراعظم عمران خان نا وژن ءِ مون آ تخسا بناکروک آ تاریخی ’’کامیاب جوان پروگرام‘‘ نا جاری کننگ آ جم حوال تننگا ۔ 17 اکتوبر آ اسلام آباد اٹی سرسہب ورناپروگرام نا ملک گیر بناءِ کننگ کن بنائی دود انا تیاری تیا ہم جم حوال تننگا ۔ عثمان ڈار پارے کہ وزیراعظم نا پارت و وژن ءِ مون آ تخسا تاریخی پروگرام اس تیار کننگانے، وزیراعظم تینا مبارک انگا دوتیٹی تاریخی پروگرام نا بناءِ کیک ۔ اوپارے کہ سرسہب ورناپروگرام نا کمک اٹ ورناتے ملکی جوڑ جاڑی و شونداری ٹی شریدار کینہ، وزیراعظم نا وژن ءِ مون آ تخسا ترتیب تروک آ پروگرام ورناتا شونداری کن مزل نا نشان مریک ۔ سیف اللہ خان نیازی پارے کہ ورناتا شونداری کن پروگرام ترتیب تننگ آ عثمان ڈار و اونا ٹیم مبارکباد نا حقدار ءُ ۔ اوپارے کہ ورناک ننا قومی وجود نا اہم انگا بشخ آک ءُ ۔ چیف آرگنائزر پاکستان تحریک انصاف مستی پارے کہ پاکستان اٹی سیاسی بدلی نا عمل اٹ ورناک ہر اول دستہ نا کڑد ءِ ادا کرینو، قومی جوڑجاڑی نا ہر مرحلہ غا ورناتے اوار کننگ اولیت ءِ ۔ اوپارے کہ روزگار نا فراوانی نا کمک اٹ ورناتے معاشی وڑاٹ وتواجہ کننگ اہم ہدف ءِ، تحریک انصاف سرسہب ورناپروگرام نا سرسہبی کن دعاگوءِ ۔