پاکستان برادر ملک آتا نیام اٹ اخوت و خیر خواہی ءِ مون آ دننگ نا خواہندار ءِ، ڈاکٹر فردوس عاشق اعوان

اسلام آباد ۔ 14اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ پاکستان ، سعودی عرب و ایران اسلامی دنیا نا مسہ اہم ءُ ایلم ءُ ۔ پاکستان نا تینا دا ہڑتوم آ ایلم تتون تاریخی و برادرانہ تعلقداریءِ، وزیراعظم عمران خان نا دورہ ڈیہہ ٹی امن و سوگوی و سیوت کن مزل نا نشان مریک، صدر حسن روحانی نا ڈیہہ ٹی امن کن پاکستان نا مخلصانہ کوشست آتا ستاہڑتوم آ برادر ملک آتا سرکڑدہ غاتا اسہ ایلو آ پت و تعلقداری تیٹی خڑکی نا درشانی ءِ ۔ ڈاکٹر فردوس عاشق اعوان دوشنبے نادے آ تینا ٹویٹ اٹی پارے کہ پاکستان برادر ملک آتا نیام اٹ اخوت و خیرخواہی ءِ مون آ دننگ نا خواہندار ءِ ۔ ڈاکٹر فردوس عاشق اعوان پارے کہ امت مسلمہ تین پہ تینی بے چیٹی تا متحمل مننگ کپسہ، سرکڑدہ غاتا کہول آ دا احساس اسلامی دنیا کن نیک فال و السی جوزہ غاتا عکاسی ءِ ۔ اوپارے کہ وزیراعظم ایرانی سرکڑدہ غاتون اوڑدہی تیٹی تین پہ تینی واپار و اقتصادی کمکاری ءِ مون آ دننگ تون اوار چندی بشخ آتے ٹی تعلقداری تے پین سوگو کننگ نا عزم انا ہم درشانی ءِ کریر ۔ ڈاکٹر فردوس عاشق اعوان پارے کہ عمران خان ایرانی سرکڑدہ ءِ مقبوضہ جموں و کشمیر نا ساڑی آ سنگین حالیت آتیان ہم معلومدار کرے و مظلوم کشمیری تا مخ تفی آ اونا منت واری ءِ ہرفے ۔