انجینئرز آک ملک ءِ توانائی ٹی خودکفیل کننگ، دیر انا زیان ءِ توننگ ، سافٹ ویئر نا بشخ انا شونداری و برآمد آتے ودفنگ کن تینا کڑد ءِ ادا کیر، صدر مملکت ڈاکٹر عارف علوی

اسلام آباد ۔ 14اکتوبر (اے پی پی) صدر مملکت ڈاکٹر عارف علوی پارینے کہ دنیا ٹی سائنسی اعتبار اٹ بھاز انگا بدلیک رونما مننگ ءُ، ہموقومک سرسہب مریرہ ہرا تینے بدلی تون ہم گرنچ کیرہ ، تعلیم و تربیت و اخلاق اسکان محدود اف، داراج انا تناءو ءِ مر کننگ نا ہم ذریعہ اسے، پاکستان اٹی دیر انا زیان ءِ تورسا کاریم اٹ اتنگ کن رکھ کننگ نا گرج ءِ ۔ راج اٹی بایدے معاشی بے ڈولی تے چٹفنگ اولیت مرے ۔ داخیال آتا درشانی ءِ او دوشنبے نادے آ داڑے ارٹ میکو جہانی انجینئرنگ ایجوکیشن کانفرنس آن تران کرسا کرے ۔ صدر مملکت پارے کہ پاکستان اٹی 100 آن زیات یونیورسٹی انجینئرنگ نا تعلیم تننگ ءُ ۔ یونیورسٹی ٹی انجینئرآتے مارکیٹ نا طلب نا رداٹ تعلیم بایدے تننگے ۔ انجینئرز آک ملک ءِ تونائی ٹی خودکفیل کننگ کن تینا کڑد ءِ ادا کیر ۔ انجینئرو ڈاکٹر آتا تعلیم اٹی ملک انا بھلو سرمایہ اس خڑچ مریک ۔ اوپارے کہ دیر انا زیان ءِ تورسا کاریم اٹ اتنگ کن رکھ کننگ نا گرج ءِ ۔ پاکستان اٹی سیوریج نا چار و نیم سد ملین گیلن دیر سمندر اٹی خسنگ انگ ءِ ۔ صدر مملکت پارے کہ سفائی نا بست و بند آک ہم اسہ بھلو ویل اسے ءُ ، ہراڑتون مون تننگ کن گام گیج کننگ نا گرج ءِ ۔ توانائی کن ڈیم تا تفنگ تون اوار اوار دیر کوڑی کننگ کن ہم گام گیج کروئی مریک ۔ اوپارے کہ ڈی سیلینیشن پلانٹ اٹی اسہ ملین گیلن دیر ساف کننگ کن اسہ میگاواٹ بجلی نا گرج ءِ و دا چرجوئی ٹی پوسکن آ ٹیکنالوجی نا کاریم اٹ اتنگ ننکن بھاز فائدہ تروک ثابت مننگ کیک ۔ راجی بشخ آتا انجینئر آتون بھلو تعلق اسے و چیلنج آتون مون تننگ کن ننے دابابت آگاہی مرے ۔ اوپارے کہ دنیا ٹی سائنسی اعتبار اٹ بھاز انگا بدلیک رونما مننگ ءُ ۔ دنیا ٹی ہمو قومک سرسہب مریرہ ہراتینے بدلی تون ہم گرنچ کیرہ ۔ صدر مملکت پارے کہ سافٹ ویئر نا بشخ اٹی شونداری و برآمد آتے ودفنگ نا بھلو گنجائشت اس ارے ۔ راج اٹی تفریق تناءو نا سوب مریک و داتناءو نا چٹفنگ کن راجی قدر ءِ عمل کننگ نا گرج ءِ ۔ اوپارے کہ پاکستان نا شونداری ءِ بھلو وخت اسسکان کٹیا کروک ہندن انگا ڈٹ آتون گنڈنگانے ہرافتا نیزگار بندغ آتون تعلق کم ئس ۔ راج اٹی بایدے معاشی بے ڈولی تے چٹفنگ اولیت مرے ۔ صدر مملکت پارے کہ داڑے انجینئرز آتا گریڈ 19 آن پد ترقی نا معاملہ غا ہیت کننگانے ۔ دا چرجوئی ٹی دا معاملہ بنجائی وزیر سائنس و ٹیکنالوجی و اودے گدریفنگے تانکہ داڑا سجفنگے ۔