مزن وزیر عمران خان ءَ یک شمبے ءَ ایران ءِ تر ءُُ تاب کت ایش خلیج ءَ ایمنی ءُُ سلامتی ءِ دیمروئی ءِ واستہ آئی ءِ گامگیج آنی تہ ءَ یک ٹوھیں گامگیج ات

تہران ۔ 13 اکتوبر (اے پی پی) مزن وزیر عمران خان ءَ یک شمبے ءِ روچ ءَ ایران ءِ تر ءُُ تاب کت ایش خلیج ءَ ایمنی ءُُ سلامتی ءِ دیمروئی ءِ واستہ آئی ءِ گامگیج آنی تہ ءَ یک ارزشتی ایں گامگیج ات، مزن وزیر ءِ ھمبراھ وزیر ءِ درئی کار شاہ محمود قریشی ، زرّ ءَ آدیم پاکستانی آنی ھاترا مزن وزیر ءِ ھاسیں کمکار سید ذوالفقار عباس بخاری ءُُ ایندگر کلانہ ایں مردم ڈل ءِ تہ ءَ ھوار اتنت ۔ مزن وزیر کارگس ءِ نیمگ ءَ جاڑی بوتگیں بیان ءِ رد ءَ مزن وزیر عمران خان ءَ ایران ءِ صدر حسن روحانی ءِ گوما وتی گند ءُُ نند ءِ ساھت ءَ دوئیں ملک آنی نزیکیں دود ءُُ ربیدگی ءُُ راجدپتری یکوئی ءِ سر ءَ چمشانک دات ۔ مزن وزیر ءَ ھاسیں رنگ ءَ تجارت ءُُ اقتصادی دیمروئی آنی جتا جتائیں شوبگ آنی تہ ءَ دوئیں ملک آنی وت مہ وتی یکوئی آناں گیش برجم کنگ ءِ جزم ءَ را ھم ساڑات ۔ آئی ءَ گوشت کہ ایران ءِ گوما جھلانکیں یکوئی مُدام پاکستانی ترجی آنی تہ ءَ ھوار انت ۔ مزن وزیر ءَ مقبوضہ جموں کشمیر ءَ گوستگیں 98روچ ءَ چہ جاڑیگیں کرفیو ءُُ 8 ملین کشمیری آنی لاک ڈاءون ءِ ھوالگ ءَ ایران ءِ کمک کنگ ءِ پد ءَ شگر ءُُ منت واری گپت ۔ مزن وزیر عمران خان ءَ وتی تر ءُُ تاب ءِ ساھت ءَ ایران ءِ سپریم لیڈر آیت اللہ سید علی خامنہ ای ءَ گوں ھم گند ءُُ نند کت ۔ مز ن وزیر ءَ مقبوضہ کشمیر ءِ ھوالگ ءَ ایران ءِ جوانیں کمکی ءَ پد ءَ پاکستان ءَ الس ءِ نیمگ ءَ ایران ءِ سپریم لیڈر ءِ شگر ءُُ منت واری گپت ۔ آئی ءَ اے جزم ءِ درشان کت کہ پاکستان ءُُ ایران ءِ دو نیمگی یکوئی آناں گیش برجم ءُُ پراھ ءُُ شاھیگان کنگ بیت ۔