مزن وزیر عمران خانءِ ایرانی صدر حسن روحانی ءِ ہمراہ نیوز کانفرنس

تہران ۔ 13اکتوبر(اے پی پی) مزن وزیر عمران خان ءَ گشتگ کہ پاکستان ءِ گوں ایران ء ُ سعودی عربءَ جہلانکیں سیادی اَست ء ُ دوئیں براتیں ملک آنی نیامءَ کستء ُ کینگءَ را سولء ُ ترانءِ وسیلگءَ ہلاس کنگءِ ھاترءَ وتی کردءَ پیلو کنگءِ ھاترءَ ساڑی اَنت، دوئیں ملک آنی نیامءَ کست ء ُ کینگ گیش اِنت بلے پہ سولء ُ تران ءِ وسیلگءَ اے ہلاس کنگ بنت ۔ اے حیالانی درشانی آئیءَ یکشمبے ءِ روچءَ ایرانءِ صدر حسن روحانی ءِ ہمرائیءَ نیوز کانفرنس ءَ گوں تران کنانءَ کتگ ۔ مزن وزیرءَ گشتگ کہ ایران ءِ صدرءَ گوں لھتیں وہداں پد اے سئمی گندء ُنند اِنت، گوں آئیءَ دونیمگی سیادیء ُ بیپاری ءِ سرءَ ہم گپء ُ تران بوتگ ۔ مقبوضہ کشمیرءَ گوں یکوئی ءِ درشانی کنانءَ ایرانی حکومتءِ شکرء ُ گزار اَنت، بھارتءَ 80لکھ کشمیری آناں مقبوضہ کشمیرءَ کیز کتگ ۔ عمران خان ءَ گشتگ کہ ایران ءَ آیگءِ بنکی سوب ایش اِنت کہ ما لوٹاں کہ خطہ ءَ جیڑہء ُ جنجال ہلاس بہ بنت ۔ عمران خانءَ گشتگ کہ ایران سعودی جیڑہ ءَ چہ خطہ ءِ امنء ُایمنی ءَ ہوار معیشت ءَ را ہم ھترہ اِنت، درائیں دیمروئی کتگیں ملک آنی ھاترءَ خطہ ءَ اے وڑیں جیڑہء ُ جنجال باز نقصان اِنت، آئیءَ گشتگ کہ آ سئے شمبے ءِ روچءَ سعودی عربءِ ترء ُتابء َ کنگءَ اِنت ۔ مزن وزیرءَ گشتگ کہ ایرانءِ صدر حسن روحانی ءَ گوں شورء ُ تران ءَ پد دلبڈی رسیتگ ۔ آئیءَ گشتگ کہ ایران ء ُ سعودی عرب ءِ ترء ُ تاب ء ُ گپء ُتران کنگ پاکستانءِ وتی گامگیج اِنت، دوئیں ملک آنی نیامءَ کستء ُکینگءَ ہلاس کنگءَ وتی کردءَ پیلو کنگءَ اِنت ۔ آئیءَ گشتگ کہ نیویارکءَ امریکی صدر ڈونلڈٹرمپ ءَ گندء ُنندءَ ایران ء ُ امریکہ ءِ نیامءَ سیادی ءَ جوا ن کنگءِ ھاترءَ کرد پیلو کنگءِ گشتگ، مرچی ایرانی صدرءَ گوں گندء ُنندءَ ایران ءِ ایٹمی پروگرام ءَ گوں ہم گرنچیں منء ُ گرء ُ امریکہ ءِ نیمگءَ چہ ایران ءِ سرءَ جتگیں بندشانی سرءَ ھیالء ُلیکہءِ درشانی کتگ ۔ آئیءَ ایرانی حکومتءَ را اے بھروسہ داتگ کہ امریکہ ایران سولء ُترانءَ وتی کردءَ پیلو کنت تنکہ امریکہ ء ُ ایرا نءِ نیامءَ ایٹمی منء ُ گر بہ بیتء ُ بندش ہلاس کنگ بہ بیت ۔ ایران ءِ صدر حسن روحانیءَ گشتگ کہ پاکستان ء ُ ایران براتیں ء ُ ہمساءگیں ملک اَنت، دوئیں ملک یکجاہ خطہ ءِ مھکمیءِ ھاترءَ کوشست کُت کناں ۔