وزیراعظم عمران خان نا مقبوضہ کشمیر نا الس تون یکجہتی نا درشانی کن انسانی دوتا زمزیر و ریلی ٹی بشخ ہلوک آتیان تران

اسلام آباد ۔ 11اکتوبر (اے پی پی) وزیراعظم عمران خان پارینے کہ مقبوضہ کشمیر اٹی ہندوستانی فوج اِراتُو آن زیات وخت آن 80 لکھ انسان تے کرفیو ٹی بند کرینے، کم و ود اسہ لکھ کشمیریک حق خودارادیت کن شہید مسر، مودی تینا آخریکو پتہ ءِ گوازی کرینے ولے کشمیری دادے امنا کپسہ، مقبوضہ کشمیر آن ہراتم کرفیو ہرفنگک تو لکھ آ خلقت پیشن پیش تمرہ و دا کسر اوفتا آجوئی نا کسر مریک، مچ آ پاکستانی قوم کشمیری ایلم تتون سلوک ءِ و سلک ۔ داخیال آتا درشانی ءِ او جمعہ نادے مقبوضہ کشمیر نا الس تون یکجہتی نا درشانی کن انسانی دوتا زمزیر و ریلی ٹی بشخ ہلوک آتیان تران کرسا کرے ۔ داوخت آ وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان ، وزیراعظم نا خصوصی کمکار نعیم الحق ، بنجائی وزیر امور کشمیر علی امین گنڈاپور و ایلو راہشونک ہم ساڑی ئسر ۔ وزیراعظم پارے کہ اینو داڑے مچ مننگ نا مسخت کشمیر نا خلقت ءِ داکلہو تروئی ءِ کہ مچ آ پاکستانی قوم اوفتے تون سلوک ءِ و سلک ۔ نن وار وار دنیا ءِ ہم دا کلہو ءِ ایتینہ کہ مقبوضہ کشمیر اٹی ہندوستانی فوج اِراتُو آن زیات وخت آن 80 لکھ انسان تے کرفیو ٹی بند کرینے ۔ اوپارے کہ ای دنیا نا دوہرے معیار ءِ مون آ اتنگ خواوہ، داہیت بھاز است ہسون ءِ کہ جہانی میڈیا ہانگ کانگ نا برانز ءِ تو جوان انگا ہیڈ لین تیٹی پیش کیک ولے مقبوضہ کشمیر اٹی زالبول، بزرگ، چنا و ناجوڑ آتون اوار 80 لکھ خلقت نا ہچ ءُ کوریج اس کپک ہرافتے 9 لکھ بھارتی فوج یرغمال کرینو و اوفتیا بیدادی کننگ انگ ءِ ۔ وزیراعظم پارے کہ تدوک آ 30 سال اٹی کم و ود اسہ لکھ کشمیری شہید مسنو ہرافتے تینا حق خودارادیت خواہنگ آ شہید کننگا ۔ دا حق اوفتے اقوام متحدہ نا سلامتی کونسل نا قرارداد آک تسنو ۔ اوپارے کہ اللہ تعالیٰ انسان نا دوٹی کوشست ءِ تخانے و سرسہبی او تینٹ ایتک ۔ نن ہم کشمیری تا تحریک نا مخ تفی ٹی تینا پبی کوشست ءِ کننگ اُن ۔ مچ آ ملک کشمیری ایلم تتون سلوک ءِ ، نم خنرہ کہ کشمیری تا حق انا بناکروک دا تحریک اسہ سمندر اس جوڑ مریک ۔ وزیراعظم عمران خان پارے کہ ای امریکہ نا دورہ ٹی جہانی لیڈرز آتون کشمیر نا ویل آ ہیت کریٹ و اوفتے دابارواٹی آگاہی تسٹ ۔ میڈیا ٹی ہم داڑاہیت مننگ ءِ وخت اس کہ یورپی یونین و اقوام متحدہ نا سلامتی کونسل اٹی ہم کشمیر نا ویل آ شرہ کننگانے ۔ اوپارے کہ نریندر مودی بھاز بھلو آمخی اس کننگ ءِ و تینا آخیریکو پتہ ءِ گوازی کرینے و او سمجھک کہ کشمیر نا خلقت دا غٹ ءِ امنا کیرہ ولے دُن مفک، کشمیر نا الس آن مرک انا خلیس ہنانے، ہراتم کرفیو ہرفنگک تو لکھ آ خلقت پیشن پیش تمرہ و داکسر اوفتا آجوئی نا کسر مریک ۔