دہشت گردی نا بابت ترکی نا گڑتی تے پورو وڑاٹ پہہ مرینہ، وزیراعظم عمران خان

وزیراعظم عمران خان نا ترک صدر رجب طیب اردوان ءِ ٹیل فون ، پاکستان نا کنڈآن ترکی تون یکجہتی نا درشان ، کمکاری نا باوری کرفے

اسلام آباد ۔ 11اکتوبر (اے پی پی) وزیراعظم عمران خان جمعہ نا دے آ ترک صدر رجب طیب اردوان ءِ ٹیل فون کرے وپاکستان نا کنڈآن ترکی تون یکجہتی نا درشانی ءِ کرسا کمکاری نا باوری کرفے ۔ وزیراعظم عمران خان پارے کہ دہشت گردی نا بابت ترکی نا گڑتی تے پورو وڑاٹ پہہ مرینہ ۔ اوپارے کہ پاکستان دہشت گردی نا برخلاف جنگ اٹی 70 ہزار آن زیات جان تا قربانی تسنے و عشرہ غاتسکان 30 لکھ آن زیات پناہ گزین آتا بھاریم ءِ سگانے ۔ اوپارے کہ پاکستان ، ترکی ہرانا 40 ہزار شاری دہشت گردی نا گواچی مسنو ، ءِ مون تروک خطرہ و چیلنج آتیان پورووڑاٹ معلومدار ءِ ۔ اوپارے کہ پاکستان ہروار آنبار ترکی تون یکجہتی نا درشانی و پورو کمکاری نا باوری کرفک ۔ اوپارے کہ نن دعاگو اُن کہ ترکی نا شام انا حالیت آتا پرامن ایسر و سلامتی و علاقائی سوگوی نا کوشست آک سرسہب مریر ۔ وزیراعظم پارے کہ پاکستان نا حکومت و الس ترک صدر رجب طیب اردوان نا بروک آتُو دورہ پاکستان نا وخت آ گرم جوشی اٹ اودے بیابخیر کننگ نا چاری ءِ ۔