اقوام متحدہ ۔ 11اکتوبر (اے پی پی) پاکستان دہشت گردی نا بنداوی سوب آتے ایسر کننگ و گڑاس مذہب و کمیونیٹی تا بارواٹی غلط تاثر تننگ نا معاملہ ءِ ایسر کننگ کن کوشست آتے ترند کننگ نا گرج آ زور شاغانے انتئے کہ داڑان مسلمان و دیکی نا نیام اٹ غلط تصور ودی مننگ ءِ ۔ اقوام متحدہ ٹی پاکستان نا آخبتی مندوب ملیحہ لودھی اقوام متحدہ نا جنرل اسمبلی ٹی دہشت گردی نا ویل آ شرہ ٹی بشخ ہلسا پارے کہ جہانی برادری مریس ایسر نا چاری جھیڑہ، واک انا غیر کانودی کاریم اٹ اتنگ، جارحیت، درملکی کوزہ، حق خودارادیت آن نمن، سیاسی و اقتصادی نا انصافی و خلقت ءِ سیاسی وڑاٹ گوجالنگ نا معاملہ غاتون اوار دہشت گردی نا بنداوی سوب آتا ایسراٹی اواری اٹ کاریم کے ۔ اوپارے کہ پاکستان ہروڑنا دہشت گردی نا مذمت ءِ کیک، پاکستان نا سفیر دہشت گردی نا چٹفنگ کن اقوام متحدہ نا جہانی سٹریٹجی ٹی پیش رفت نا ذکر ءِ کرسا پارے کہ دہشت گردی نا برخلاف جنگ انا بابت گڑاس مذہب و کمیونٹی تے ناروا وڑاٹ بدنام کننگ نا روش ءِ چٹفے ۔ اوپارے کہ مسلمان تا برخلاف خارتروک تقریر آتیان نئے بیرہ رویہ غاتے ٹی تلخی بریک بلکن مسلمان و دیکی نا نیام اٹ غلط فہمی ہم ودی مریک و داچیلنج آتون سیاسی کانودی، مذاکراتی گام گیج و مذاکرات، سفارتکاری و آب وڑاٹ مون تننگے ۔ اوپارے کہ پاکستان ءِ انسداد دہشت گردی نا جامع حکمت عملی نا سوب آن اینو سوگوی دوئی ءِ ۔ اوپارے کہ بیرہ فوجی ذریعہ اٹ دہشت گردی ءِ چٹفنگ مفک، پاکستان تینا وڑ مچ آ راج و کمیونٹی راہشون تا رابطہ تون دا ویل اتون مون تننگ ءِ و انسداد ہشت گردی نا ٹھوس بیانیہ ءِ مون آ دننگ ءِ ، علاقائی کمکاری ٹی ودکی کننگ ءِ و تینا جہانی زمواری تے پورو کننگ ءِ ۔
