اسلام آباد ۔ 11اکتوبر (اے پی پی) بنجائی وزیر سائنس و ٹیکنالوجی چوہدری فواد حسین پولیس ناکہ غاتیان نجات نا تکنیکی ایسری اس پیش کننگ آ 20 لکھ روپئی نا انعام نا پڑو ءِ کرینے ۔ جمعہ نادے تینا اسہ ٹویٹ اسے ٹی او مچ آ ملک اٹی تکنیکی پٹ وپول نا بشخ اتون گنڈوک چاہندار و خاص کر ورناتپہ ءِ سلہ خلک کہ او پولیس ناکہ غاتیان نجات نا تکنیکی ایسر اس پیش کیر ۔ اوپارے کہ دابابت گچین نظریہ پیش کننگ آ 20 لکھ روپئی انعام تننگک ۔ بنجائی وزیر تینا کلہو اٹی مستی پارے کہ ٹیکنالوجی نا چاہندارآک 3ہفتہ نا تہہ ٹی تینا سلاہ و سوج آتے پیش کیر ۔ یات سلے کہ بنجائی دارالحکومت تون اوار مچ آ ملک انا بھلا شار تیٹی اہم شاہراہ تیا ناکہ خلنگک ۔ داناکہ غاتیا غٹ گاڈی تا چیک کننگ ممکن ہی اف ولے دا ناکہ ٹریفک نا روانی ٹی اڑاند ضرور شاغک و سہب انا وخت اٹی ہزار آ سرکاری و نجی ملازم و طالب علم آتے دفتر و تعلیمی ادارہ غاتے ٹی سرمننگ آہرے مریک ۔ داہرے مننگ آن نئے بیرہ دفتر آتے ٹی کاریم نا حرج و طالب علم آتا نہادی وخت زیان مریک بلکن ہزار آ گاڈی تا رفتار سست مننگ نا سوب اوفتا مول آن چاگڑد ءِ سخت نسخان رسینگک و وخت آ کاریم نا جاگہ و تعلیمی ادارہ غاتے ٹی سرمننگ نا خواہندار ملازم و طالب علم آتا اسہ بھلو کچ اس پولیس و تعلقدار ادارہ غاتا نابودی نا سزا ءِ کُننگ آ بیوس مریرہ ۔
