اسلام آباد ۔ 11اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ 27 اکتوبر آ کشمیری الس مقبوضہ کشمیر اٹی بھارتی نا انصافی و ریاستی استحصال نا برخلاف یوم سیاہ نا وڑاٹ اڈ ایترہ، مولانا فضل الرحمان دادے ءِ قوم اٹی بے چیٹی شاغنگ کن گچین کرینے و اودادے آ یوم ءِ یکجا کننگ نا جاگہ غا منتشر کننگ خواہک ہراڑان اونا مذموم عزم قوم انا مون آ بسنے، نجی ٹیلی ویژن تون گپ وتران کرسا اوپارے کہ قوم یکجا و یک زبان مرسا اونا عزم انا مون آ مش انا خل آنبار سلک وبھارتی جارحیت ءِ ہکل ترسا کیک، قوم 27 اکتوبر ءِ یوم سیاہ نا وڑاٹ اڈ ایتک ۔ اوپارے کہ ہراتم قوم آ دُن ءُ وخت اس بریک قوم یکجا مسنے، 2014ٹی ہراتم پی ٹی آئی برانز کریسس تو اسلام آباد اٹی دفعہ 144نافذ ئس و کانود حرکت اٹی بسوسس و داسہ حرکت اٹی بریک، کانود کس اسے نا دوتے ٹی یرغمال مننگ کپک ۔ حالیت و واقعہ غاتے ہرسا داوخت گام گیج آتیا فیصلہ کننگک ۔ اسہ سوج اسے نا ورندی ٹی اوپارے کہ شہباز شریف اینو تینا است ءِ پدین کرینے، او(ن) لیگ نا پٹارہ غان ہراہرا عجوبہ غاتے دوئی کرینے اوڑان اونا جماعت نا اوسان خطا مسنے و ترجمان (ن) لیگ ہم اودے مسترد کننگ ءِ ۔ اوپارے کہ (ن) لیگ نا تہہ ٹی دھڑابندی مون آ بسنے ۔ ڈاکٹر فردوس عاشق اعوان پارے کہ شہباز شریف تینٹ تینا ایلم نا کاریم تیان تنگ ءِ و او حکومت نا کنڈاسنگتی نا دُو ءِ مریفنگ خواہک، ساڑی حالیت آتے ٹی وڈی خور دوتے امنا کپک، کس اسے اگہ ریلیف اس ہلوئی ءِ تو او عدالت آتا درگہ غاتے ٹکیفے ۔ حکومت کانود نا دوتے سوگو کننگ خواہک ۔
