اسلام آباد ۔ 11اکتوبر (اے پی پی) پاک بحریہ نا سروک ایڈمرل ظفرمحمود عباسی سی پاور کانفرنس 2019ء ٹی بشخ ہلنگ کن آسٹریلیا غا سرمس، مسہ دے ئی سی پاور کانفرنس اٹی 80 آن زیات ملک آتا نمائندہ غاک بشخ ہلکنو، امیر البحر چندی ملک آتا بحریہ نا سروک آتون اہم گپ و تران کرے ۔ ترجمان پاک بحریہ نا رداٹ دا کانفرنس انٹرنیشنل میری ٹائم ایکسپوزیشن نا چرجوئی نا اسہ سرگرمی اسے ۔ کانفرنس اٹی ایڈمرل ظفرمحمود عباسی آسٹریلیا، برونائی و فلپائن نا بحریہ نا سروک آتون جتا جتا اوڑدہی کرے ۔ اوڑدہی تیٹی تین پہ تینی است خواہی نا معاملہ و ہڑتوم آ کنڈآتا بحری کمکاری آہم گپ و تران کننگا ۔ امیر البحر اوڑدہی تیٹی جہانی بحری فوج آتیا تالان کمبائنڈ میری ٹائم فورس آتے ٹی پاک بحریہ نا کڑد و پاک بحریہ نا ریجنل میری ٹائم سیکورٹی پٹرول نا گام گیج آتے مون آ تخا ۔ سروک پاک بحریہ دہشت گردی نا برخلاف پاکستان نا عزم انا درشانی ءِ کرے و جہانی میری ٹائم سیکورٹی کن کروک آ کوشست آتے ٹی پاکستان نا کڑد ءِ تالان کرے ۔
