سرینگر ۔ 11اکتوبر (اے پی پی) مقبوضہ کشمیر اٹی جمعہ نادے آ پورو پدریسہ 68 می دے ہم گیشتر علاقہ غاتے ٹی کشمیری تے بھارت نا فوجی محاصرہ و مواصلاتی پابندی تا سوب آن بھاز مشکل آتون مون تروک مس ۔ کشمیر میڈیا سروس نا رداٹ کشمیری تے سخت پابندی تا سوب خور و دوائی تتون اوار ضرورت نا گڑاتا بھاز کاختی مون تروک ءِ و خلقت ءِ موبائل و انٹرنیٹ سروس آتون اوار ذراءع مواصلات و پبلک ٹرانسپورٹ معطل مننگ نا سوب مقبوضہ علاقہ و مقبوضہ علاقہ غان پیشن تینا دوست آتا بارواٹ ہچ ءُ حوال اس اف ۔ داوخت آ کیہی وارخواہی تیا خلقت ءِ تینا سیال آتا کزیت نا بارواٹ حوال اسہ ہفتہ یا اوکان ہم پد ملا ۔ پدریسہ لاک ڈاءون و ایمبولینس آتا دوئی مفننگ نا سوب آن گڑاس بندغ وخت آ ہسپتال آ دپننگ نا سوب آن کزیت کرینو ۔ کوزہ گر انتظامیہ نا کنڈآن خلقت ءِ نماز جمعہ غان پد بھارت مخالف مظاہرہ کننگ آن توننگ کن دامان کشمیر اٹی کرفیو کون آ پابندی تے دُوارہ خلنگا ۔ یات سلے کہ کوزہ گر انتظامیہ 05اگست آن پد آن مقبوضہ علاقہ نا غٹ بھلا مسیت و درگاہ تیا نماز جمعہ نا خواننگ نا موکل تتنے ۔ داڑے امریکی سینیٹر میگی حسن ٹویٹر آ جاری اسہ کلہو اسے ٹی بھارت وپاکستان نا نیام اٹ بے چیٹی تا چٹفنگ نا وڑوڈول ءِ پٹنگ آ زور شاغانے ۔ کشمیر اٹی ودوک آ بے چیٹی تا بارواٹی اوپارے کہ ہڑتوم آ کنڈ حالیت آتے ٹی گچینی نا وڑوڈول ءِ پٹنگ المی ءِ ۔ میگی حسن پارے کہ او داسہ بھارت نا دورہ ءِ کننگ ءِ ہراڑے او حالیت و جہانی واپار نا بارواٹی پین گپ و تران کن کمامدارآتون اوڑدہی کیک ۔
