اسلام آباد ۔ 10اکتوبر (اے پی پی) دفاعی جاچکار ایئر مارشل (ر) شاہد لطیف پارینے کہ بھارت ءِ فرانس ساختہ رافیل جنگی جہاز ملنگ آن ہم پاکستان نا بھارت آ فضائی برتری ٹی ہچ ءُ پرخ اس تمیتنے و ننا بھارت آ فضائی برتری داسہ ہم برقرار ءِ ۔ پنچ شنبے نادے آ ’’اے پی پی‘‘ تون خصوصی گپ و تران کرسا ایئر مارشل (ر) شاہد لطیف پارے کہ بھارت نا سد آ جنگی جہاز بے کار مسنو، او اسہ وخت اسے آن فورتھ جنریشن جہاز جوڑ کننگ و ولدا دوئی کننگ کن کوشست کریکہ ۔ داجہاز جوڑ کننگ اٹ بے سہبی آن پد او رافیل نا سوداءِ کرینے، داڑان بھارتی ایئر فورس ءِ زرس سیبو ضرور ملک ولے پاکستان نا بھارت آ فضائی برتری داسہ ہم برقرار ءِ ۔ اوپارے کہ نن تون ایف 16جہاز ارے وخت اس کہ جے ایف تھنڈر ہراکہ پوسکن آ دور انا گچین انگا جہاز ءِ، ہرادے نن تینٹ تیار کننگ اُن ۔ ایئرمارشل (ر) شاہد لطیف پارے کہ بھارت دا دروغ و بے بنداو پروپیگنڈا کننگ ءِ کہ دا فرانسیسی ساختہ جہاز آتیان پد اودے فضائی برتری دوئی مسنے و دُن ءُ ہچ اس اف ۔
