اسلام آباد ۔ 10اکتوبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ پاکستان کشمیر نا ویل آ گچین سفارت کاری نا حکمت عملی آ عمل کننگ ءِ، متحرک سفارت کاری نا سوب جہانی کہول آ پاکستان نا موقف نا است بڈی ءِ کننگ انگ ءِ، کشمیری تے حق خودارادیت ترفنگ کن غٹ تر کوشست آتے برجاتخنہ، کشمیری تتون یکجہتی کننگ کن یوم یکجہتی کشمیر ءِ جمعہ نادے آ پبی وڑاٹ اڈتننگک ۔ ڈی چوک اسلام آباد اٹی دُوتا زمزیر اس جوڑ کننگک ۔ داخیال آتا درشانی ءِ او پنچ شنبے نادے آ داڑے یوم یکجہتی کشمیر ءِ اڈتننگ نا بابت بڑزکو کہولی دیوان نا کماشی ءِ کرسا کرے ہراٹی تعلقدار ادارہ غاتا بڑزکو کمامدارآک ساڑی ئسر ۔ بنجائی وزیر یوم یکجہتی کشمیر نا بابت بست و بند آتا جاچ ءِ ہلک ۔ علی امین گنڈاپور پارے کہ یوم یکجہتی کشمیر ءِ پبی وڑاٹ اڈتننگک ، کشمیری تتون یکجہتی کننگ کن ڈی چوک اسلام آباد اٹی دُوتا زمزیر اس جوڑ کننگک ۔ اوغٹ تعلقدار ادارہ غاتے پارت کرے کہ غٹ ادارہ غاک یوم یکجہتی کشمیر اڈتننگ نا بابت پبی بست و بند کیر ۔ علی امین گنڈاپور پارے کہ یکجہتی کشمیر نا بابت دودآتیان ایل او سی نا ہڑتوم آ کنڈپبی کلہو سرمننگ ءِ ۔ مودی نا ہندو شدت پسند ایجنڈا ءِ ہر کہول آ بے نقاب کینہ ۔ اوپارے کہ وزیراعظم کشمیر نا ویل ءِ جہانی کہول آ پبی وڑاٹ تالان کرینے و پاکستان کشمیر نا ویل آ سفارتکاری آ عمل کننگ ءِ ۔ اوپارے کہ پاکستان نا کوشست آتیان جہانی برادری و جہانی میڈیا ٹی کشمیر نا ویل انا بابت حساسیت اٹ خاطر خواہ ودکی مسنے ۔ علی امین گنڈاپور پارے کہ جہانی کہول آ دا احساس ودی مسنے کہ کشمیر نا ویل ءِ پین گوجالنگ مفک ۔ کشمیری تے حق خودارادیت ترفنگ کن غٹ تر کوشست آتے برجاتخنہ ۔
