جہانی برادری مقبوضہ کشمیر اٹی کرفیو نا دمدستی چٹفنگ کن کڑد ادا کے
اسلام آباد ۔ 10اکتوبر (اے پی پی) وزیر خارجہ شاہ محمود قریشی پارینے کہ برطانیہ تون اوار جہانی برادری ءِ مقبوضہ کشمیر نا لکھ آ کودک انسان تے بھارتی استبداد آن نجات ترفنگ و بے سوب کرفیو نا دمدستی چٹفنگ کن کڑد ادا کروئی مریک ۔ شاہی جوڑہ نا پاکستان نا دورہ غان ہڑتوم آ ملک آتا نیام اٹ متکن آ تعلقداری تے پین مون آ دننگک ۔ داہیت ءِ او پاکستان اٹی برطانیہ نا ہائی کمشنر تھامس ڈریو تون گپ و تران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے ۔ دفترخارجہ نا ترجمان نا رداٹ اوڑدہی ٹی مقبوضہ جموں و کشمیر اٹی جاری انسانی حق انا سنگین خلاف ورزی، برطانوی شاہی جوڑہ نا دورہ پاکستان آ گمانی بننگ و ایلو ہڑتوم آ کنڈآتا تین پہ تینی است خواہی نا معاملہ غاتیا گپ و تران کننگا ۔ وزیر خارجہ پارے کہ 5اگست آن بھارت مقبوضہ جموں و کشمیر اٹی کرفیو خلسا 80 لکھ بے گناہ کشمیری تے گھٹ کرینے ۔ مقبوضہ جموں و کشمیر اٹی بنداوی انسانی حق انا سنگین خلاف ورزیک ترند مسنو ۔ برطانیہ تون اوار جہانی برادری ءِ مقبوضہ کشمیر نا لکھ آ کودک انسان تے بھارتی استبداد آن نجات ترفنگ و بے سوب کرفیو نا دمدستی چٹفنگ کن کڑد ادا کروئی مریک ۔ داوخت آ کڑدہ غاک مقبوضہ جموں و کشمیر تون اوار ڈیہہ ٹی امن وایمنی کن تین پہ تینی سلابت ءِ برجاتخنگ آ امنا کریر ۔ شاہ محمود قریشی پارے کہ پاکستانی تا است اٹی برطانوی شاہی خاہوت نا بھاز تکریم ءِ ، برطانوی شہزادہ ولیم و اونا اُرائی کیٹ مڈلٹن نا پاکستان آ بننگ نا چاری اُن ۔ اوپارے کہ 2006ء ٹی ہراتم شہزادہ چارلس و ڈچز آف کارنوال پاکستان آ بسر تو اوفتا فقید المثال بیابخیری ءِ کننگاسس ۔ وزیر خارجہ پارے کہ شاہی جوڑی نا پاکستان آ بننگ آ خصوصی بست و بند کننگک ۔ شاہی جوڑی نا دورہ پاکستان آن ہڑتوم آ ملک آتا نیام اٹ متکن آ تعلقداری تے پین مون آ دننگک ۔
