پاکستان ڈیہہ ٹی امن نا کوشست آتا مخ تفی ءِ برجاتخک
اسلام آباد ۔ 10اکتوبر (اے پی پی) چیئرمین سینیٹ محمد صادق سنجرانی پارینے کہ پاکستان ڈیہہ ٹی امن نا کوشست آتا مخ تفی ءِ برجاتخک، پاکستان جہانی امن نا خاطر بھلو قربانی اس تسنے، مقبوضہ کشمیر اٹی تدوک آ 66دے آن کرفیو نا سوب انسانی بحران نا کیفیت ودی مسنے، پاکستان اوغانستان اٹی امن نا خواہندار ءِ ۔ داخیال آتا درشانی ءِ او پنچ شنبے نادے سوئزر لینڈ انا سفیر تھامس کولی تون اوڑدہی ٹی کرے ۔ اوڑدہی ٹی تین پہ تینی است خواہی نا معاملہ غاتون اوار اہم علاقائی و جہانی معاملہ غاتیا گپ و تران کننگا ۔ چیئرمین سینیٹ پارے کہ ڈیہہ نا ترندی اٹ بدلینگوک حالیت و راستکی تے مون آ تخسا امن و شونداری ءِ موقع تننگ المی ءِ ۔ اوپارے کہ پاکستان ڈیہہ ٹی امن نا کوشست آتا مخ تفی ءِ برجاتخک ۔ پاکستان جہانی امن نا خاطر بھلو قربانی اس تسنے ، دنیا ءِ بایدے مرے کہ پاکستان نا قربانی تے امنا کے ۔ چیئرمین سینیٹ مقبوضہ کشمیر نا حالیت آتا بارواٹ سوئزر لینڈ انا سفیر ءِ معلومدار کرسا پارے کہ کشمیر اٹی تدوک آ 66دے آن کرفیو لگوک ءِ، مقبوضہ دامان ءِ جیل اس جوڑ کننگانے ، کرفیو نا سوب انسانی بحران نا کیفیت ودی مسنے، دنیا اودے اسہ انسانی ءُ ویل اس سرپندکرسا تیناکڑد ءِ اداکے ۔ مقبوضہ کشمیر نا الس ءِ ظلم و جبر انا نشانہ کننگ انگ ءِ، اوپارے کہ سوئزر لینڈ مقبوضہ دامان اٹی بھارتی ظلم و جبر ءِ تورفنگ کن تینا کڑد ءِ اداکے ۔ اوپارے کہ اوڑدہی ٹی ہڑتوم آ کنڈآتا رابطہ، واپاری کمکاری، پارلیمانی تعلقداری و ادارہ جاتی کمکاری ءِ پین مون آ دننگ آ امنا کرینو ۔ اوپارے کہ نومبر اٹی سوئزر لینڈانا پارلیمنٹ نا اسپیکر نا دورہ غان پارلیمانی تعلقداری تا بشخ اٹی اسہ پوسکن ءُ دوراس بناکیک ۔ پارلیمانی سفارتکاری و کمکاری نا کمک اٹ السی کہول آ رابطہ غاتے ودفنگ مریک، اوڑدہی ٹی اوغان امن عمل و ساڑی آ ڈائیلاگ آ گپ و تران کرسا اوپارے کہ پاکستان اوغانستان اٹی امن نا خواہندار ءِ ۔ اوغانستان نا ویل سیاسی ءِ و اونا سیاسی ایسر ی ءِ ڈائیلاگ نا کمک اٹ کشوئی مریک ۔
