اسلام آباد ۔ 10اکتوبر (اے پی پی) پاکستان جہانی برادر ی آ زور شاغانے کہ او سویلی ایشیا نا ڈیہہ ءِ سلہہ غاتا رُمب اٹ دِکہ تف، پاکستان تینا دفاع ءِ جوانی اٹ چاہک و مچ آ دنیا 27 فروری نا واقعہ نا گواہ ءُ ۔ پاکستان نا سفارتی کوشست آک بھارت ءِ جہانی کہول آ تنیا کرینو ۔ مقبوضہ کشمیر اٹی 66دے آن برجاکرفیو آن کشمیری تا زند یند مسنے ۔ کشمیر نا ویل ءِ غٹ جہانی فورم تیا تالان کرسا کینہ ۔ کرتار پور راہداری نا بنا تینا تخوک آ وخت آ مریک ۔ ترجمان دفترخارجہ ڈاکٹر محمد فیصل پنچ شنبے نادے آ ہفتہ وار بریفنگ اٹی بھارت نا کنڈآن سلہہ غاتا بے تحاشا ہلنگ و کوڑی کننگ نا بابت اسہ سوج اسے نا ورندی ءِ ترسا جہانی برادری ءِ خبڑ دار کرے کہ او سویلی ایشیا نا ڈیہہ ءِ سلہہ غاتا رُمب اٹ دِکہ تف ۔ رافیل یا ایلو جیٹ جہاز آتا معاملہ مرے پاکستان تینا دفاع ءِ جوان کننگ چاہک و مچ آ دنیا 27 فروری نا واقعہ نا گواہ ءُ ۔ ترجمان پارے کہ پاکستان اسہ ہم سلہہ سے نا رُمب اٹ اوار مفک ۔ پاکستان نا ساڑی حکومت انسانی شونداری ، جان جوڑی و تعلیم آ چکار کننگ ءِ ۔ مقبوضہ کشمیر اٹی 66دے آن برجا کرفیو نا بابت ترجمان پارے کہ پدریسہ کرفیو آن کشمیری تا زند یند و دوائی تتون اوار بنداوی گرج انا گڑاک ناپید مسنو ۔ پاکستان مظلوم کشمیری تتون سلوک ءِ و نن کشمیری الس نا مصائب و کشمیر نا ویل ءِ غٹ جہانی فورم تیا تالان کرسا کینہ ۔ ترجمان پارے کہ مقبوضہ کشمیر اٹی بیدادی آ پڑدہ شاغنگ نا بھارت نا غٹ کوشست آک بے سہب مسنو و جہانی کہول آ کشمیری الس آ بیدادی نا ادراک مسنے ۔ اوپارے کہ مسہ امریکی صدارتی اومیت دار ہم مقبوضہ کشمیر اٹی انسانی حق انا سنگین خلاف ورزی تیا ہیت کرینو ۔ ترجمان پارے کہ پاکستان نا سفارتی کوشست آک بھارت ءِ جہانی کہول آ تنیا کرینو ۔ اسہ سوج اسے نا ورندی ءِ ترسا ترجمان پارے کہ کرتارپور راہداری نا بنائی دود اٹی بشخ ہلنگ کن بھارت نا مسکوہی وزیراعظم من موہن سنگھ ءِ سلہ خلنگانے وخت اس کہ کرتارپور راہداری نا بناتخوک آ وخت آ مریک ۔ ترجمان پارے کہ اسلام آباد اٹی سارک سروک دیوان نا اڈتننگ کن تاریخ نا تعین آ کاریم مننگ ءِ ۔ اوپارے کہ وزیراعظم عمران خان ممکنہ وڑاٹ سعودی عرب و ایران نا دورہ ءِ کیک ۔ شام انا حالیت آتا بابت ترجمان پارے کہ پاکستان ڈیہہ ٹی ترکی نا روا سیکورٹی گڑتی تے امنا کیک و غٹ اسٹیک ہولڈرآتیا زور شاغانے کہ شام انا ویل انا سیاسی ایسر اس کشنگے ۔
