بیجنگ(اے پی پی) مزن وزیر عمران خان ءَ گوں چینءِ نیشنل پیپلز کانگریس ءِ چیئرمین لی یان شونءَ چارشمبے ءِ روچءَ مزنیں اُلسی ہال ءَ گندء ُنندکتگ ۔ آئی ءَ دوئیں ملک آنی نیامءَ دونیمگی سیادی ء ُ دمگی ء ُ میاں اوستمانی کارانی سرءَ حیالء ُ لیکہ ءِ درشانی کتگ ۔ گندء ُ نندءَ مزن وزیر عمرا ن خانءَ کشمیرءِ جیڑہءِ ہوالگءَ ہمراہ داری کنگءَ چین ءِ صدر ء ُ آئیءِ حکومتءِ شگرء ُ منت گپتگ ۔ مزن وزیرءَ گشتگ کہ گرانیں وہداں چین ءَ ہمک تکءَ گوں پاکستانءَ ہمراہ داری کتگ ۔ آئیءَ گشتگ کہ چینءَ پاکستانءَ را اقتصادی جیڑہء ُ جنجالاں چہ درکنگء ِ ھاترءَ موہ داتگ ۔ آئی ءَ چین پاکستان اقتصادی راہداری ( سی پیک) فریم ورک ءِ ردءَ چینءِ کمک ءِ سرءَ وشی ءِ درشانی کتگ ۔ مزن وزیر عمران خان ءَ گشتگ کہ پاکستان ء ُ چین دائمی دوست اَنت ۔ مزن وزیر عمران خان ءَ چینءِ صدر شی جن پنگ ءَ را اُلسی جمہوریہ چینءِ 70می ودی روچءِ مراد بات داتگ ۔ آئی ءَ وتی ء ُ وتی ڈل ءِ پُرمڈائیں وش اَتک کنگءَ صدر شی جن پنگ ءِ شگرء ُ منت گپتگ ۔ گندء ُنندءَ چین ءِ صدر ءَ اقوام متحدہ ءِ جنرل اسمبلی ءِ دیوان ءَ چین پاکستان سیادی ءِ سرءَ مزن وزیر عمران خانءِ گوشتانکءَ را ساڑاتگ ۔
