حلقہ ٹی شونداری ڈٹ آتا جال اس تالان کرینن، کوہلوءِ رول ماڈل ضلع اس جوڑ کننگ کن گام گیج کننگ انگ ءِ، صوبائی وزیر جان جوڑی میر نصیب اللہ مری

کوءٹہ ۔ 08 اکتوبر (اے پی پی) صوبائی وزیر جان جوڑی میر نصیب اللہ مری پارینے کہ حلقہ ٹی شونداری ڈٹ آتا جال اس تالان کرینن ، کوہلو ءِ رول ماڈل ضلع اس جوڑ کننگ کن گام گیج کننگ انگ ءِ ۔ جان جوڑی ، کنوئی ءُ ساف دیر و تعلیم نا بشخ آتے ٹی گام گیج کننگ انگ ءِ ، صوبہ نا غٹ ضلع غاتے ٹی جان جوڑی نا بابت خصوصی گام گیج کننگانے، ڈسٹرکٹ ہیڈکوارٹر ہسپتال اٹی لیڈی میڈیکل آفیسر و الٹراساءونڈ اسپیشلسٹ تون اوار گائنا کالوجسٹ نا تعیناتی زوت کننگک ۔ داخیال آتا درشانی ءِ او تینا حلقہ کوہلو نا چندی علاقہ غاتا شونداری ڈٹ آتا معائنہ ءِ کرے ۔ داوخت آ صوبائی وزیر جان جوڑی میر نصیب اللہ مری میڈیا تون گپ وتران کرسا پارے کہ مولانا فضل الرحمان دُز، داڑیل آتے بچفنگ کن مارچ کننگ ءِ ۔ عمران خان ملک انا پیسہ غاتے پلوک آتا برخلاف گھیرا تنک کرے، داسہ تینے بچفنگ کن نت و دو خلنگ ءُ، تدوک آ حکومت آک الس نا پیسہ غاتے بے دڑدی اٹ پلار ۔ صوبائی وزیر شار انا گلی محلہ غاتے ٹی سیوریج سسٹم نا تنصیب تون ، روڈ آتا جوڑ کننگ نا مد اٹی کروڑ آ روپئی نا اسکیم آتا بناءِ کرینے، ڈپٹی کمشنر ءِ پارت کرے کہ او غیر کانودی تجاوزات آتا برخلاف بے پرخ کارروائی کے شار انا زیبائی کن شونداری ڈٹ منظور مسنے ۔ صوبائی وزیر مری آباد اٹی سیوریج لین تا معائنہ ءِ ہم کرے ۔ سیوریج نظام نا ابتر حالیت آتیا صوبائی وزیر چیف آفیسر میونسپل کارپوریشن ءِ ہلہلئی بنداوتیا گام گیج کننگ نا سختی اٹ پارت کرے ۔ داوخت آ صوبائی وزیر تون اوار ڈپٹی کمشنر کوہلو عبداللہ کھوسہ، رسالدار میجر شیر محمد مری، تحصیلدار عبدالصمد مری، ایکسین پی ایچ ای محسن لاشاری ، ایکسین ایریگیشن عرفان لاشاری ، میر دوست علی مری، حاجی عبدالرحمان مری، میر جہانزیب مری اس ئسر ۔