اسلام آباد ۔ 08 اکتوبر (اے پی پی) وزیراعظم نا سلاہکار موسمیاتی بدلی ملک امین اسلم پارینے کہ پاکستان ءِ ہراڑے معاشی چیلنج آتا مون تروک ءِ ہموڑے موسمیاتی بدلی و کچٹی ہم بھلو ویل اسے، ساڑی حکومت نا کنڈآن کچٹی نا مون ءِ توننگ و ماحولیات نا رکھ اکن پبی گام گیج کننگ انگ ءِ، 2030ء اسکان 30 درسد گاڈی بجلی آ گدریفنگک ۔ سے شنبے نادے آ داڑے ’’بڑھتا ہواپاکستان‘‘ نا دود آن تران کرسا اوپارے کہ پاکستان ءِ ہراڑے معاشی چیلنج آتا مون تروک ءِ ہموڑے موسمیاتی بدلی و کچٹی ہم بھلو ویل اسے، موسمیاتی بدلی جی ڈی پی ءِ زہمی کیک ۔ اوپارے کہ موسمیاتی بدلی جہانی چیلنج اسے ہرانا سوب آن درجہ حرارت اٹی ودکی نا سوب گلیشئرز تالان مننگ ءِ ۔ موسمیاتی بدلی نا بھس کاری تا مون تروک ءِ، پاکستان موسمیاتی بدلی آن بھاز زہمی مروک آ ملک ءِ ۔ اوپارے کہ کچٹی بھاز بھلو ویل اسے ہرادے نن تینٹ ایسر کننگ کینہ، درخت خلنگ ننا ڈٹ ءِ و دانا رداٹ چار سال اٹی دہ ارب درخت خلنگک ، ورناو پرائیویٹ سیکٹر ءِ اوار کرسا شجر کاری مہم کننگ اُن ، شجر کاری نا چندی ڈٹ آک ءُ ۔ ہرافتیا عملدرآمد مننگ ءِ ۔ ملک امین اسلم پارے کہ اسلام آباداٹی کچٹی نا چٹفنگ کن پلاسٹک بیگ آتیا پابندی خلکن ہرا اسہ بھلو گام گیج اسے ، ہنداوڑ نن سفائی و سوزہ نا مانیٹرنگ کن کلین گرین پاکستان انڈیکس آ ہم کاریم کننگ اُن ۔ اوپارے کہ 40 درسد چاگڑدی کچٹی گاڈی تا سوب آن ودی مریک ، دانا انسداد کن ای وہیکل پالیسی اس جوڑ کرینن ہرانا رداٹ 2030ء اسکان 30 درس گاڈی تے بجلی آ گدریفنگک ۔
