جہانی برادری مظلوم کشمیری تیا بیدادی نا برخلاف توار بڑز کے، اسد قیصر
اسلام آباد ۔ 08 اکتوبر (اے پی پی) اسپیکر قومی اسمبلی اسد قیصر پارینے کہ ساڑی حکومت غٹ ملک آتون اواری اٹ پاکستان اٹی زرکاری ءِ اولیتی بنداو تیا مون آ دننگ خواہک، پاکستان ڈیہہ ٹی امن ءِ مون آ دننگ کن سرگرم کڑد ادا کننگ ءِ، بھارت نا کنڈآن 64دے آن پدریسہ کرفیو خلنگ اٹ مقبوضہ کشمیر ءِ دنیا نا غٹ آن بھلا جیل جوڑ کرینے، جہانی برادری مظلوم کشمیری تیا مروک آ بیدادی نا برخلاف ہیت کے ۔ سے شنبے نادے آ پاکستان اٹی جاپان نا سفیر اسپیکر قومی اسمبلی اسد قیصر تون پارلیمنٹ ہاءوس اٹی اوڑدہی کرے داوخت آ ہڑتوم آ کنڈآتا تعلقداری و تین پہ تینی است خواہی نا معاملہ غاتیا گپ و تران کننگا ۔ اسپیکر قومی اسمبلی اسد قیصر جاپان نا سفیر تون گپ و تران کرسا پارے کہ پاکستان جاپان تون تینا پارلیمانی رابطہ غاتے بھاز قدر انا نظر اٹ ہرک ۔ جاپان صنعت ، سیل و سوات و معاشی شونداری نا اعتبار اٹ ڈیہہ ٹی اسہ جتا ءُ ہند اس تخک ۔ اوپارے کہ پاکستان جاپان تون غٹ بشخ آتے ٹی زرکاری ءِ مون آ دننگ نا خواہندار ءِ ۔ ساڑی حکومت غٹ ملک آتون پاکستان اٹی زرکاری ءِ اولیتی بنداو تیا مون آ دننگ خواہک ۔ پاکستان و جاپان نئے بیرہ اسہ ہی براعظم اٹ واقع ءُ بلکن ہڑتوم آ ملک آتے ٹی جمہوریت و انسانی آجوئی نا اقدار ہم قدر مشترک ءُ ۔ اسپیکر قومی اسمبلی پارے کہ پاکستان ڈیہہ ٹی امن ءِ مون آ دننگ کن سرگرم کڑد ادا کننگ ءِ ۔ کشمیر نا ویل برصغیر نا تقسیم نا بے پورو ایجنڈاءِ دادے ایسر کننگ آن بیدس ڈیہہ ٹی امن مننگ کپک ۔ بھارت نا کنڈآن 64دے آن پدریسہ کرفیو خلنگ مقبوضہ جموں و کشمیر ءِ دنیا نا غٹ آن بھلا اوپن جیل اس جوڑ کرینے ۔ اوپارے کہ جہانی دنیا مظلوم کشمیری تیا مروک آ بیدادی نا برخلاف بایدے ہیت کے ۔ داوخت آ جاپانی سفیر پارے کہ پاکستان تون تینا تعلقداری تے پین سوگو کننگ خواہک ۔ جاپان پاکستان تون توانائی ، صنعت ، سیل و سوات نا بشخ آتے ٹی کمکاری ءِ مون آ دننگ خواہک ۔ اوپارے کہ جاپان پاکستان اٹی معاشی شونداری ءِ مون آ دننگ کن کمکاری ءِ برجاتخک ۔ جاپان پاکستان اٹی تعلیم، توانائی و انفارمیشن ٹیکنالوجی نا بشخ آتا گچینی کن کمکاری ٹی ودکی کیک ۔
