اسلام آباد ۔ 08اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ کرپشن و شکست کنوک ادارہ غاتا بنداو آ ریاست مدینہ نا پنجر سلنگ کپک، داڑکن اصلاحات المی ءِ ۔ نجی ٹیلی ویژن تون گپ وتران کرسا اوپارے کہ حکومت نا کنڈآن اسہ سال اٹی کروک آ اصلاحات آتا کمک اٹ وزیراعظم عمران خان خراج ہلنگ ءِ اولیکو وار تحریک اسے نا دروشم تسنے ۔ اوپارے کہ خراج نا کمک اٹ یکجا کروک آ پیسہ غاتے زالبول آتے واکدار کننگ نادار بندغ آتے وام تننگ، روزگار نا وارخواہی ودی کننگ ولنگر خانہ جوڑ کننگ اٹ خڑچ کننگ انگ ءِ ۔ دا پیسہ غاتیان پین ڈٹ بناکرسا ریاست مدینہ نا کنڈاپیش قدمی نا بناءِ کرینن ۔ خصوصی کمکار پارے کہ ملک اٹی ہر کنڈ اکانود نا حکمرانی ءِ، نم غٹ دا کانود نا مون آ جوابدہ اورے ۔ اوپارے کہ داوخت آ ادارہ غاک با اختیار ءُ، وزیراعظم عمران خان ریاست مدینہ ءِ رول ماڈل اس جوڑ کرسا غٹ چیلنج آتون عہدہ براہ مننگ نا عزم تخک ۔ اوپارے کہ روزگار نا وارخواہی ودی کننگ ہی نیزگاری ءِ چٹفنگ نا آزموندہ وڑوڈول ءِ، لنگرخانہ تینا جاگہ ولے خودانحصاری بھاز زیات اہم ءِ ۔ ڈاکٹر فردوس عاشق اعوان پارینے کہ ننے دا ہم احساس ارے کہ پاکستان اٹی صنعت نا پہیہ چلینگک تو اُراتا چولہا چلینگک ۔ اوپارے کہ داغٹ ہمو گام گیج آک ءُ ہرا ملک اٹی روزگار نا وارخواہی فراوان کیک ۔ بے روزگار ورناتے کاروبار نا کمک اٹ اوفتے اوفتا نت تیا سلفنہ، و اوفتے لنگر خانہ غاتے ٹی ہِننگ نا ضرورت تمپک ۔ اوپارے کہ حکومت نا اولیت ورناتے راجی رکھ فراوان کننگ نا ءِ و دا غٹ گام گیج آک ہندا چرجوئی نا اہم کڑیک ءُ ۔
