اسلام آباد ۔ 08 اکتوبر (اے پی پی) صدر مملکت ڈاکٹر عارف علوی زمی جمب انا زہمی تتون ہمدردی و یکجہتی نا درشانیءِ کرسا غٹ تعلقدار بنجائی و صوبائی ادارہ غاتیا زور شاغانے کہ او قدرتی آفت آتا خطرہ غاتے ٹی کمتی ، تیاری، نسخان آتے ٹی کمتی و زہمی تا بحالی ءِ المی کننگ کن ہم گرنچی ودی کیر ۔ قدرتی آفت آتا مون ءِ توننگ کن تینے تیار کننگ و بھس کاری نا خطرہ غاتے کم کننگ کن زیات آن زیات کوشست کننگ نا عزم انا درشانی ءِ کننگ نا گرج ءِ ۔ داہیت ءِ او 8 اکتوبر 2005ء نا تباہ کن زمی جمب آن زہمی خاہوت آتون یکجہتی و ہمدردی نا درشانی ءِ کننگ کن قومی یوم استقامت نا وخت آ تینا کلہو اٹی پارے ۔ اوپارے کہ دادے ننے 2005ء نا تباہ کن زمی جمب نا یات ترفک ہرا آزاد جموں و کشمیر، خیبر پختونخوا و ملک انا ایلو بشخ آتے ٹی بھس کاری کریسس، ہراڑان جان ، مال و انفراسٹرکچر ءِ بے پناہ نسخان مسوسس ۔ اینو ای پاکستان نا الس ءِ خراج تحسین پیش کننگ خواوہ ہرافک قدرتی آفت آتون مون ترسا ہمت ، قربانی نا جوزہ و استقامت نا درشانی ءِ کریر ۔ اوداہموخاہوت آتون ہم دلی ہڑزخواہی کرے ہرا24ستمبر 2019ء آ ساڑی آ زمی جمب آن میر پور و بھمبر ضلع غاتے ٹی جے کے ضلع و ضلع جہلم اٹی زہمی مسوسر ۔ اوباورکرفے کہ غم انا داساہت اٹی زہمی تتون نن ہروڑنا کمک کینہ ۔ صدر مملکت پارے کہ قومی یوم استقامت ہم اسہ موقع سے ہراٹی قدرتی آفت آتون مون تننگ کن تینے تیار کننگ و بھس کاری نا خطرہ غاتے کم کننگ کن زیات آن زیات کوشست کننگ نا عزم انا درشانی ءِ کننگے ۔ ڈاکٹر عارف علوی پارے کہ قدرتی آفت آک معیشت و ننا راج انا ہربشخ ءِ بھاز بے وڑ زہمی کرینو ۔ ڈیزاسٹرمینجمنٹ نا غٹ آن حساس پلو نزور بندغ، زالبول، چناک، بزرگ و معذور آک ءُ ۔ ہراقدرتی آفت آتے ٹی بایدے اولیت مریر ۔ اوپارے کہ داخوشی نا ہیت اسے کہ نیشنل ڈیزاسٹرمینجمنٹ اتھارٹی (این ڈی ایم اے) نا کماشی ٹی ننا قومی ڈیزاسٹرمینجمنٹ سسٹم الس اٹی شعور تالان کننگ و کثیر جہتی لاءخی تیٹی ودکی کن کوشست کننگ ءِ ۔ صدر مملکت غٹ تعلقدار بنجائی و صوبائی ادارہ غاتیا زور شاغا کہ بھس کاری نا خطرہ غاتے ٹی کمتی ، تیاری، تخفیف و بحالی ءِ المی کننگ کن ہم گرنچی ودی کننگے ۔
