اسلام آباد ۔ 08اکتوبر (اے پی پی) وزیراعظم عمران خان دا عزم انا درشانی ءِ کرینے کہ حکومت پاکستان قدرتی آفت آتیان مروک آ بھس کاری تون مون تننگ کن تیاری، خطرہ غاتے ٹی کمتی اتنگ و گچین توننگ کن پین گچین و ہروڑنا گام گیج کننگ نا چرجوئی ءِ برجاتخک ۔ او8 اکتوبر آ دوارہ مون آبروک قوت نا دے انا وخت آ تینا کلہو اٹی پارے کہ پاکستان سانحہ غاتا خطرہ غاتے ٹی کمتی اتنگ نا بابت علاقائی و جہانی فریم ورک انا رداٹ تینا زمواری تے پورو کننگ کن پرعزم ءِ ۔ وزیراعظم 2005ء نا است ہسون زمی جمب نا 14سال پورو مننگ نا وخت آ تینا اسہ کلہو اسے ٹی 8 اکتوبر نا زمی جمب اٹی زہمی تا خاہوت آتون ہڑزخواہی کرے ۔ اوپارے کہ دُن تو زمی جمب نا دابھلا واقعہ بھس کاری، د ڑدو غم انا ناقابل فراموش یات ہلانے ، ولے پاکستانی قوم چیلنج آتا مقابلہ ءِ کرسا قربانی ، انسان دوستی، تین پہ تینی کمک و دُوارہ مروک آ بروک قوت نا مثالی جوزہ نا درشانی ءِ کریر ۔ وزیراعظم پارے کہ داوخت آداوڑ نا بھس کاری تتون مون تننگ کن ہرانظام ساڑی ءِ او داحالیت آتون مون تننگ نا قابل ہرگز الوکہ ولے اودے خوشی ءِ کہ پارلیمنٹ نا کمک اٹ اسہ جامع و موثر نیشنل ڈیزاسٹر مینجمنٹ سسٹم اس ٹہیفنگانے ۔ اوپارے کہ نن نظام اٹی پین اصلاحات اتنگ و دانا سوگوی کن پرعزم اُن ۔ وزیراعظم میرپور ، آزاد جمو ں وکشمیر نا ساڑی آ زمی جمب نا زہمی تے خراج عقیدت پیش کرے و داعزم انا درشانی ءِ کرے کہ او اوفتا پورو بحالی اسکان زہمی علاقہ غاتے ٹی خلقت ءِ ہروڑنا کمک فراوان کرسا کیک ۔ اومستی پارے کہ کنے اومیت ءِ کہ دُوارہ مروک آ بروک قوت نا قومی دے پاکستان نا الس ءِ بھس کاری نا خطرہ غاتا بابت بست و بند انا بارواٹ نئے بیرہ تینا علم اٹی ودکی کننگ کن است بڈی کیک بلکن تیاری، رکھ ، لچک و خودانحصاری نا کلہو اس ہم تالان کیک ۔
