زرکارآتے کن آسانی ودی کرینن، است خواہی ءِ کہ چین پاکستان اٹی ٹیکسٹائل ، آئی ٹی، فنانس، اُراتا تفنگ، کشت وکشار و سیل و سوات نا بشخ آتے ٹی زرکاری کے، چین اتون آزادانہ واپار نا معاہدہ کننگ والا اُن
بیجنگ ۔ 08 اکتوبر (اے پی پی) وزیراعظم عمران خان پارینے کہ پاکستان زرکاری کن رکھ انگا ملک ءِ ، معاشی اصلاحات آتا سوب آن زرکارآک پاکستان اٹی است خواہی ہلنگ ءُ، چین اتون آزادانہ واپار نا معاہدہ کننگ والا اُن، چین پاکستان اقتصادی راہداری نا ویل آتا ایسری کن سی پیک اتھارٹی اس جوڑ کننگانے، گوادر بندرگاہ سی پیک ڈٹ انا بنداو ءِ، پاکستان اٹی سیل و سوات نا بشخ اٹی شونداری نا بھلو وارخواہی اس ارے، ننے اُراتا کاختی نا مون تروکءِ ، 5سال اٹی 50لکھ اُراتا ڈٹ آ کاریم کننگ اُن، حکومت درملکی زرکارآتے آزاد ویزہ نا آسراتی تسنے، خوانہ کہ زرکارآک پاکستان آ بریر و کٹیا کیر ۔ داخیال آتا درشانی ءِ او جہانی واپار نا مون آ دننگ کن جوڑ چائنا کونسل نا دیوان آن تران کرسا کرے ۔ وزیراعظم پارے کہ چین نا 70 می قومی دے آ مبارکباد پیش کینہ ۔ مہالو چین پاکستان آن ہیل کرے داسہ پاکستان چین آن ہیل کننگ ءِ ۔ ننے چین آن دا ہیل کننگ نا گرج ءِ کہ او قوم ءِ ہمہ نیزگاری آن کشا ۔ اوپارے کہ چین دنیا ٹی ترند انگا شون ہلوک آ ملک ءِ و چین تدوک آ پنچ سال اٹی وڈی خوری نا چٹفنگ کن وزارتی کہول نا 400 بندغ ءِ سزا ترفسا جیل آتے ٹی بند کرے ۔ نن ہم وڈی خور بندغ آتا برخلاف ہندن ءُ کارروائی کننگ خوانہ ولے ننا نظام سست ءِ، خیسن آ فیتہ نا اڑاند ہم وڈی خوری نا سوب آن مریک ۔ اومیت ءِ کہ کرار کرار آ حالیت آک گچین مریرہ ۔ نیزگاری نا چٹفنگ کن چین نا گام گیج آتیان مچ آ دنیا ہیل کننگ کیک ۔ اوپارے کہ چین 30 سال اٹی 70 کروڑبندغ ءِ نیزگاری آن کشا ۔ وڈی خوری ملک آتا شونداری ٹی غٹ آن بھلا اڑاند ءِ، چین وڈی خوری نا برخلاف سرسہبی دوئی کرے ۔ اوپارے کہ پاکستان اٹی وڈی خوری نا مون ءِ توننگ اٹ زرس وخت لگک ۔ وزیراعظم پارے کہ ملک اٹی زرکاری بفننگ نا بھلا سوب وڈی خوری ءِ و چین نا کمیونسٹ پارٹی نا سرسہبی تیان ہیل کننگ اُن ۔ پاکستان اٹی امن و ایمنی نا حالیت آک گچین مسنو ۔ سی پیک نا ویل آتے ایسر کننگ کن سی پیک اتھارٹی اس جوڑ کرینن ۔ گوادر بندرگاہ سی پیک ڈٹ انا بنداو ءِ ۔ پاکستان نا سٹریٹجک محل و وقوع نا سوب آن زرکارآک داڑے زرکاری کیرہ ۔ پاکستان نا آبادی نا 60 درسد بشخ ورناتیا تالانءِ ۔ زرکاری ٹی ودکی کن اصلاحات اتنگ اُن ۔ پاکستان اٹی سیل و سوات نا بشخ اٹی بھلو وارخواہی اسے ۔ پاکستان اٹی شونداری کن میرٹ نا پالیسی ءِ تینا کروئی مریک مذہبی سیل و سوات ءِ مون آ دننگ کن ہم گام گیج کننگ انگ ءِ ۔ پاکستان اٹی خلقت ءِ اُراتا بھاز کاختی نا مون تروک ءِ ، چین داٹی ہم زرکاری کننگ کیک، مچ آ ملک اٹی 50 لکھ اُراتا تفنگ نا ڈٹ آکاریم کننگ اُن ۔ پاکستان زرکارآتے کن رکھ انگا ملک ءِ ۔ پاکستان اٹی زرکاری کن درملکی تیکن آسان ویزہ غاتا آسراتی تسونن ۔ اوپارے کہ چین پاکستان تون آزادانہ واپاری معاہدہ کننگ والا ءِ ۔ چینی زرکارآتون ہیت وگپ اکن دورہ غا بسونٹ ۔ اوپارے کہ پاکستان اٹی زرکاری نا بے پناہ وارخواہی ارے انتئے کہ نن زرکارآتے کن آسانی ودی کرینن ۔ پاکستان نا است خواہی ءِ کہ چین ٹیکسٹائل ، آئی ٹی، فنانس، کشت وکشار و سیل و سوات نا بشخ آتے ٹی زرکاری کے ۔ اوپارے کہ پاکستان اٹی خیسن و تانبہ نا بھلو کوڑی اس ساڑی ءِ ۔ اوپارے کہ خوانہ کہ زرکارآک پاکستان آ بریر و کٹیا کیر ۔ داکان مست چائنہ کونسل فروغ جہانی واپار( سی سی پی آئی ٹی) آ بننگ آ کونسل نا چیئرپرسن گاءوژان وزیراعظم ءِ بخیر کرے ۔
