اسلام آباد ۔ 07 اکتوبر (اے پی پی) خیبر پختونخوا نا وزیراطلاعات شوکت یوسفزئی پارینے کہ مولانا فضل الرحمان نا آزادی مارچ بے مسخت ءِ و دادے مچ آ قوم ہم چاہک ۔ نجی ٹیلی ویژن تون گپ و تران کرسا اوپارے کہ مولاناتینٹ چیئرمین کشمیر کمیٹی رہینگانے، اوکان پد ہم 27اکتوبر آ مارچ انا پڑو ءِ کرینے ۔ شوکت یوسفزئی پارے کہ مولانا کشمیری تا یوم سیاہ ءِ بے سہب کننگ خواہک ۔ اوپارے کہ مولانا سیاسی وڑاٹ برانز کننگ خواہک تو ضرور کے نن اودے ہچ پاپنہ، ننے گڑتی ءِ کہ او مدرسہ غاتا چنکا چنکا چناتے اتسا اوفتے ڈھال انا وڑاٹ کاریم اٹ اتنگ و دھرنہ تننگ خواہک ہرانا اودے موکل تفننگک ۔ اسہ سوج اسے نا ورندی ٹی اوپارے کہ پاکستان اٹی ہچءُ مذہبی معاملہ اس چلینگ انگ اف، گستاخی رسول ﷺ نا بارواٹ ہچ کس سجفنگ ہم کپک، نن ہر ویل انا ایسری کن نن تینٹ حاضر اُن ۔ وزیر اطلاعات خیبر پختونخوا پارے کہ وزیراعظم عمران خان اقوام متحدہ ٹی تقریر کرسا اہل دیکی ءِ اوفتا بولی ٹی پہہ کرے کہ اسلام اخس پرامن ءُ مذہب اسے و نن تینا پیغمبر خواجہ محمد ﷺ تون اخس مہر و مریبت کینہ ۔ شوکت یوسفزئی پارے کہ مولانا فضل الرحمان تینا برانز ءِ کے ولے اگہ اومدرسہ غاتا چناتے روڈ آتیا اتنگ نا کوشست کرے تو نن اودے سختی اٹ تورنہ ۔
