نیزگارو نزور تپہ غاتا خذمت ءِ کننگ غٹ آن بھلا نیکی ءِ، شیفکو تپہ ءِ ہرفنگ کن ہروڑنا گام گیج کینہ، ہزگار آتیان خراج ہلسا نیزگارآتیا خڑچ کینہ ، پدسلوک آتپہ غاتے کن احساس پروگرام نا رداٹ پین گام گیج کینہ
اسلام آباد ۔ 07 اکتوبر (اے پی پی) وزیراعظم عمران خان حقدار، نادار و نزور تپہ غاتے آسراتی تا فراوانی نا عزم انا درشانی ءِ کرسا پارے کہ پوسکن آ پاکستان اسہ فلاحی ریاست اسے نا قیام مریک، شیفکو تپہ ءِ ہرفنگ کن ہروڑنا گام گیج کینہ، ہزگار آتیان خراج ہلسا نیزگار آتیا خڑچ کینہ ۔ داخیال آتا درشانیءِ او دوشنبے نادے آ داڑے احساس سیلانی لنگرخانہ اسکیم نا بناءِ کرسا کرے ۔ وزیراعظم عمران خان پارے کہ سیلانی ٹرسٹ ءِ دا نیک کاریم نابناکننگ آ مبارکباد ی ایتیوہ، خوش قسمت خلقت اللہ نا نیک کاریم نا کنڈا راغب مریرہ، ا للہ تعالیٰ نیک کاریم کروک آتا است اٹ سکون ودی کیک ۔ اوپارے کہ ہراتم کینسر ہسپتال نا بناءِ کریٹ تو بھاز خوش قسمت خلقت تون اوڑدہی مس ۔ وزیراعظم پارے کہ نیزگار، نادار و نزور تپہ غاتا خذمت ءِ کننگ غٹ آن بھلا نیکی ءِ، احساس پاکستان نا تاریخ نا نیزگاری ءِ چٹفنگ نا غٹ آن بھلا پروگرام ءِ ۔ دا پروگرام نا رداٹ ورنا و زالبول آتے روزگار و وام تننگک ۔ اوپارے کہ مچ آ ملک اٹی اولیکو مرحلہ ٹی 112لنگرخانہ ملنگ انگک ۔ دالنگرخانہ غاتے ہمو علاقہ غاتے ٹی ملفنگک ہراڑے خواری کش، بے روزگاری و بین نا گواچی ءُ ۔ اوپارے کہ حکومت واپار و صنعت آتے مون آ دننگ کن ہروڑنا کمک فراوان کننگ ءِ، مشکل ءُ وخت اسے ولے ننے نزور تپہ غاتا احساس ارے، کوشست ءِ کہ مخلوق لنگڑ مف ۔ وزیراعظم پارے کہ یونیورسٹی تیٹی ریاست مدینہ نا وڑآ پروگرام نا بناءِ کننگ اُن، ریاست مدینہ ٹی نزور تپہ نا زمواری ءِ ریاست ہلیک و دا فلاحی ریاست اس مریک، ریاست مدینہ قرآن و سنت نا عملی عکس ئس ۔ اوپارے کہ ریاست مدینہ ٹی نزور تپہ غاتا احساس ئس، ریاست مدینہ اولیکو دے جوڑ متو بلکن مرحلہ وار جہد اٹی دا ریاست جوڑ مس ہرانا مسخت السی و راجی آسراتی ئس ۔ اوپارے کہ تدوک آ کیہی سال آن نیزگار نیزگار تر و ہزگار ہزگار تر ین مننگ ءِ، نیزگارخراج ایتک ہزگارخراج تفک، خوانہ کہ ہزگار آتیان خراج ہلین و نیزگارآتیا خڑچ کین ۔ اوپارے کہ کوشست ءِ کہ کاروباری تپہ ءِ بڑزا ہرفن، کاروبار ءِ مون آ دننگ آن روزگار نا وارخواہی ودی مریک ۔ اوپارے کہ احساس پروگرام اٹی سیلانی ٹرسٹ ءِ ہم اوار کننگک ، پوسکن آ پاکستان فلاحی ریاست اس جوڑ مریک، پوسکن آ پاکستان کن جہد برجاءِ، پدریسہ ملک اٹی بدلی بریک، 70 سال انا ویل آتے ایسر کننگ اٹ گڑاس وخت لگک ، نزور تپہ غاتا کمک ءِ کننگ آن ملک اٹی برکت بریک ۔ اوپارے کہ نیزگارتیکن جاگہ تفنگانے ، ہسپتال و پولیس نا نظام اٹی گچینی اتنگ اُن، نادار تپہ غاتسکان ارغ سرکننگ کن لنگر خانہ غاتا کچ اٹی ودکی نا چرجوئی برجاسلک،پدسلوک تپہ غاتے کن احساس پروگرام نا رداٹ پین گام گیج کینہ ۔ داوخت آ گپ و تران کرسا وزیراعظم نا راجی رکھ و نیزگاری نا چٹفنگ نا خصوصی کمکار و احساس پروگرام نا سروک ڈاکٹر ثانیہ نشتر پارے کہ وزیراعظم عمران خان تینا است اٹ خواری کش آتا خاص احساس ءِ تخک ۔ وزیراعظم اول نیزگارآتے چھت فراوان کننگ کن جاگہ جوڑ کننگ نا کاریم نا بناءِ کرے و داسہ نیزگارآتے کن احساس لنگر اسکیم نا بناءِ کرینے ۔ بروک آ سال مچ آ ملک اٹی 112لنگرخانہ بناکننگک ہراڑے حقدار بندغ آتے عزت و شرف اٹ اِرغ تننگک ۔ سیلانی ٹرسٹ نا سروک مولانا بشیر فاروق قادری گپ و تران کرسا پارے کہ وزیراعظم عمران خان نیزگار و پسماندہ تپہ غاتا دڑد و احساس ءِ تینا است اٹی تخک ۔ وزیراعظم ریاست مدینہ نا تصور نا عملی تعبیر کن گام گیج کننگ ءِ ۔ سیلانی ویلفیئر ٹرسٹ دا معاملہ غا اوڑتون ہم کوپہ سلوک ءِ ۔
