الس نا رسینگ ءِ المی کننگ کن پارلیمنٹ ہاءوس اٹی خصوصی بیابخیری کاءونٹر اس جوڑ

اسلام آباد ۔ 04اکتوبر (اے پی پی) الس نا پارلیمنٹ ہاءوس اسکان رسینگ ءِ المی کننگ کن خصوصی بیابخیری کاءونٹر اس جوڑ کننگانے ہرانا بناءِ اسپیکر قومی اسمبلی اسد قیصر جمعہ نادے آ کرے ۔ داوخت آ قومی اسمبلی نا باسک آک و پارلیمنٹ ہاءوس نا ایلو عملہ ہم ساڑی ئسر ۔ دا بیابخیری کاءونٹر نا کمک اٹ لس بندغ ہم قومی اسمبلی نا کارروائی ءِ ہُننگ کیک ۔ پارلیمنٹ ہاءوس نا صدر درگہ تون لس بندغ کن بیابخیری کاءونٹر اس جوڑ کننگانے ہراڑے ملک انا ہر شاری تینا اصل نادرا شناختی کارڈ اتون برسا پہلے آئیے، پہلے پائیے نا بنداوآ لس بندغ پریس گیلری ناپاس ءِ دوئی کننگ کیک ۔ قومی اسمبلی سیکرٹریٹ نا کنڈآن جاری ضابطہ اخلاق نا رداٹ ملک انا لس شاری نادرا نا اصل کمپیوٹرائزڈ قومی شناختی کارڈ اتون خصوصی بیابخیری تون رجوع کیک ۔ اونا شناختی کارڈ ءِ نادرا نا عملہ پک کیک اوکان پد اودے ناقابل انتقال لس بندغ گیلری پاس جاری کننگک ۔ داخلہ گیٹ نمبر 5آن مریک، ہروڑنا کانودی شکنی آ تعلقدار زموار بندغ نا برخلاف کانودی کارروائی کننگک ۔ مہمان تے پارلیمنٹ ہاءوس ناتہہ ٹی موبائل فون ، پیجر ، ٹیپ ریکارڈ و ریکارڈنگ نا ایلو ازباب، سلہہ، چھتری ، کیمرہ ، چھڑی ہینڈ بیگ، اٹیچی کیس و کتاب پین پین دنگ نا موکل مفک ۔ گیلری تیٹی تمباکونوشی ، تالی خلنگ و نعرہ بازی کننگ ممنوع مریک ۔ مہمان تا ماڑی ٹی لس بندغ گیلری آن بیدس پین جاگہ سے آہِننگ منع مریک ۔ پورو کواءف نا تفننگ ناحالیت اٹ پاس جاری کننگ نا درخواست ءِ امنا کننگپک ۔