سکردو ۔ 04اکتوبر (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ وزیراعظم عمران خان ہر پاکستانی نا زند انا آب ءِ بڑز کننگ کن کوشست کننگ ءِ ، مستین نا حکمرانک ملک ءِ وام تا دلدل اٹ اختہ کریر و الس ءِ بنداوی آسراتی تیان محروم کریر، گلگت بلتستان نا الس ءِ غٹ بنداوی آسراتی تا فراوانی کن کوشست کننگ اُن، سیل و سوات و معدنیات گلگت بلتستان کن قدرت نا عطیہ اسے ہرافتے کاریم اٹ اتسا داجاگہ نا محرومی تا ازالہ ءِ کننگ مریک، گلگت بلتستان نا الس ءِ اسہ جہانی آب انا یونیورسٹی اس ایتنہ و غٹ تعلیمی ادارہ غاتے ٹی آب اٹ تعلیمی آسراتی تا فراوانی ننا اولیت ءِ ۔ داخیال آتا درشانی ءِ او سکردو ٹی اسہ جلسہ سے آن تران کرسا کرے ۔ اوپارے کہ سکردو نا الس نا مشکل آتا ایسری کن ہروڑگام گیج کننگ اُٹ و داجاگہ نا الس ءِ بنداوی آسراتی تا فراوانی اسکان آرام اٹ تولپرہ ۔ اوپارے کہ ساڑی حکومت تعلیم نا پڑاٹ انقلابی گام گیج کننگ ءِ ہرانا بھرمک بروک آ پنچ سال اٹی خننگرہ و گلگت بلتستان نا اسہ چناس ہم تعلیم آن محروم مفک ۔ اسکول آتے گچین آسراتی تیان آراستہ کننگ اُن ۔ اوپارے کہ ورناتا تعلیم و تربیت و اوفتے روزگار نا فراوانی پاکستان تحریک انصاف نا حکومت نا گچین کاری منشور نا بشخ ءِ ہرادے پورو کننگ کن ہروڑنا گام گیج آتے کاریم اٹ اتنگ انگ ءِ ۔ اوپارے کہ معاشی گچینی و ملکی سوگوی پاکستان تحریک انصاف نا ایجنڈا نا بنداوی تمبہ ءِ ہراڑکن ننا حکومت دے و نن کوشست کننگ ءِ ۔ اوپارے کہ وزیراعظم عمران خان خواہک کہ ملک اٹی الس نا پیسہ غاک الس آ خڑچ مریر و ہچ کس السی پیسہ غاتے پُلنگ کپ ۔ ہر نرینہ و نیاڑی ءِ اسہ وڑ انصاف دوبرے و ہراوعدہ غاتے نن کننگ اُن او فتے ضرور پورو کینہ ۔ علی امین گنڈاپور پارے کہ مستین نا حکمران خواتوسہ کہ نما چناک انجینئر و ڈاکٹر جوڑ مریر ، نن داڑے جہانی آب انایونیورسٹی تا جوڑ کننگ نا پڑو ءِ کینہ ۔ داوخت آ پاکستان تحریک انصاف گلگت بلتستان نا عہدیدار و کارندہ غاتا بھلو کچ اس ساڑی ئسر وخت اس کہ چندی زند انا بشخ آتیان تعلق تخوک آ بندغ، سیاسی کارندہ و الس علاقہ نا بھلو کچ اس لس جلسہ ٹی بشخ ہلکر ۔
