وزیراعظم عمران خان نا ایوان ہائے صنعت و واپار نا ڈل اتون گپ و تران

اسلام آباد ۔ 03اکتوبر (اے پی پی) وزیراعظم عمران خان پارینے کہ کاروباری برادری و حکومت نا سوگو پارٹنر شپ معیشت و ملکی شونداری کن بے کچ اہم ءِ ، نیب انا بابت کاروباری برادری نا گڑتی تا ایسری کن لاءحہ عمل اس ٹہیفنگانے و دا چرجوئی ٹی کاروباری شخصیت آتیا تالان کمیٹی اس ٹہیفنگ انگ ءِ تانکہ نیب و کاروباری برادری نا بابت معاملہ غاتے جوان وڑاٹ ایسر کننگ مرے، او ملک انا جتا ایون ہائے صنعت و واپار آن تعلق تخوک آ ڈل آتون گپ و تران کریکہ ہرافک پنچ شنبے نادے آ داڑے اوڑتون اوڑدہی کریر، ڈل اٹی جتا چیمبرآتا مسکوہی وساڑی صدر آک اوار ئسر ۔ وزیراعظم نا سلاہکار خزانہ ڈاکٹر عبدالحفیظ شیخ ، وزیراعظم نا سلاہکار واپار عبدالرزاق داءود، چیئرمین زرکاری بورڈ زبیر گیلانی و ایلو سینئر آفیسر آک ہم اوڑدہی ٹی ساڑی ئسر ۔ واموقع غا کراچی ، لاہور، گوجرانوالہ ، سیالکوٹ، اسلام آباد و فیصل آباد نا ایوان صنعت و واپار نا صدر آک معیشت نا گچینی و کاروباری سرجزآتے ٹی ترندی اتنگ خاص کر برآمد آتے ودفنگ نا بابت وزیراعظم ءِ جتا سلاہ پیش کریر ۔ ڈل وزیراعظم نا پوریاگر برادری تون پدریسہ اوڑدہی و بزنس کمیونٹی تون اوار ہِننگ نا پالیسی نا ستاءِ کرے، ڈل اقوام متحدہ نا جنرل اسمبلی ٹی مدلل تقریر و کشمیر نا مقدمہ ءِ پبی وڑاٹ پیش کننگ آ وزیراعظم ءِ خراج تحسین پیش کرسا پاریر کہ وزیراعظم پاکستان ننا جوزہ غاتا پورو ترجمانی ءِ کرینے ۔ ڈل وزیراعظم ءِ کاروباری برادری ءِ مون تروک ویل آتیان معلومدار کرے و دا چرجوئی ٹی جتا سلاہ پیش کرے ۔ وزیراعظم پارے کہ ساڑی حکومت کاروباری برادی ءِ ہروڑ آسراتی تننگ کن پرعزم ءِ ۔ اوپارے کہ نیب انا بابت کاروباری برادری نا گڑتی تا ایسری کن لاءحہ عمل اس ٹہیفنگانے و داچرجوئی ٹی کاروباری شخصیت آتیا تالان کمیٹی اس ٹہیفنگ انگءِ تانکہ نیب و کاروباری برادری نا بابت معاملہ غاتے جوان وڑاٹ ایسر کننگ مرے ۔ ملک انا آخبت معیشت نا شونداری تون وابستہ ءِ ۔ وزیراعظم پارے کہ کاروباری برادری و حکومت نا سوگو پارٹنر شپ معیشت و ملک انا شونداری کن بے کچ اہم ءِ ۔ اوپارے کہ بزنس کمیونٹی نا سرسہبی ملک انا سرسہبیءِ ۔ نن خوانہ کہ بزنس کمیونٹی کن آسانی ودی مرے و او کٹیا کروک کاروباری سرجز انجام تننگ کیر ۔ حکومت دارداٹ ہروڑ کمک کیک ۔