وزیر خارجہ شاہ محمود قریشی تون ملا عبدالغنی برادر نا کماشی ٹی طالبان ڈل انا اوڑدہی، مذاکرات نا زوت بحالی نا گرج آ امنا

اسلام آباد ۔ 03اکتوبر (اے پی پی) وزیر خارجہ شاہ محمود قریشی تون قطر انا دارالحکومت دوحہ ٹی طالبان نا سیاسی دفتر نا بڑزکو کہول ڈل ملاعبدالغنی برادر نا کماشی ٹی پنچ شنبے نادے آ وزارت خارجہ ٹی اوڑدہی کریر ۔ اوڑدہی ٹی ڈیہہ نا حالیت، اوغان امن عمل تون اوار تین پہ تینی است خواہی نا معاملہ غاتیا گپ و تران کننگا ۔ کڑدہ غاک مذاکرات نا زوت بحالی نا گرج آ امنا کریر ۔ وزیر خارجہ مخدوم شاہ محمود قریشی ڈلءِ وزارت خارجہ ٹی بخیر اٹ پارساپارے کہ پاکستان و اوغانستان نا نیام اٹ ہڑتوم آ کنڈآتا برادرانہ تعلقداری، مذہبی دودوربیدہ، و تاریخی بنداو تیا ٹی ءِ ۔ تدوک آ چِل سال آن اوغانستان اٹی نزوری نا بھرم ءِ ہڑتوم آ ملک آک اسہ وڑ کُننگ ءُ ۔ وزیر خارجہ پارے کہ پاکستان سچا انگا است اٹ سمجھک کہ جنگ ہچ ءُ ویل اسے نا ایسراف، اوغانستان اٹی امن کن ’’مذاکرات‘‘ ہی مثبت و اسٹ انگا کسر ءِ ۔ ننے خوشی ءِ کہ اینو دنیا، اوغانستان نا بابت ننا موقف نا تائید ءِ کننگ ءِ ۔ پاکستان خوش دلی اتون تدوک آ چار دہائی آن لکھ آ اوغان باہوٹ ایلم تا میزبانی ءِ کرسا بننگ ءِ ۔ وزیر خارجہ شاہ محمود قریشی پارے کہ پاکستان اوغان امن عمل اٹی اسیجا زمواری نا رداٹ بے کچ ایمانداری اٹ مصالحانہ کڑد ادا کرینے ۔ پرامن اوغانستان مچ آ ڈیہہ نا امن و سوگوی کن المی ءِ ۔ ننا است خواہی ءِ کہ کڑدہ غاک مذاکرات نا زوت بحالی نا کنڈآ راغب مریر تانکہ دیرپا، و پائیدار اممن و سوگوی نا کسر آوار مننگ کے ۔ اوغان طالبان نا بڑزکو کہولی ڈل اوغان امن عمل اٹ پاکستان نا مصالحانہ کڑد انا ستاءِ کرے ۔ وزیر خارجہ مخدوم شاہ محمود قریشی پیدوار کرے کہ پاکستان اوغان امن عمل ءِ سرسہب کننگ کن تینا مصالحانہ کڑد ءِ سچا انگا است اٹ ادا کرسا کیک ۔