پاک فوج انا سروک جنرل قمر جاوید باجوہ نا سیمینار آن تران

راولپنڈی ۔ 03اکتوبر (اے پی پی) پاک فوج انا سروک جنرل قمر جاوید باجوہ پارینے کہ قومی سلامتی نا تعلق معیشت تون ءِ و ملک اٹی داخلی سیکورٹی نا حالیت آتے ٹی گچینی بسنے، سیکورٹی حالیت آتے ٹی گچینی نا اقتصادی سرجزآتیا مثبت زہم تمانے ۔ او معیشت و سیکورٹی نا تین پہ تینی اثر و نفوذ نا سرحال آن سیمینار آن تران کریکہ ۔ پاک فوج انا شعبہ تعلقات عامہ (آئی ایس پی آر) نا رداٹ پاک فوج انا سروک جنرل قمر جاوید باجوہ نا میزبانی ٹی آرمی آڈیٹوریم اٹی معیشت و سیکورٹی نا تین پہ تینی اثرونفوذ نا سرحال آن سیمینار اس مس ہراٹی حکومت نا معاشی ٹیم و ملک انا کاروباری راہشونک بشخ ہلکر، سیمینار نا مسخت ہم گرنچی ءِ مون آ دننگ کن سلاہ تیار کروئی ئس ۔ دُن انگا شرہ غاتا مسخت غٹ کڑدہ غاتے اسہ پلیٹ فارم اس مہیا کننگ ناءِ، اقتصادی ٹیم پوریاگر برادری ءِ حکومتی گام گیج آتیان معلومدار کرے ۔ جنرل قمر جاوید باجوہ پارے کہ شونہالی قومی سلامتی نا گرج آتے پورو کننگ و معاشی شونداری آن ہی بننگ کیک ۔ آرمی چیف بشخ ہلوک آتا منت واری ءِ ہرفے ۔ آئی ایس پی آر نا رداٹ سیمینار اٹی کاروباری برادری کاروبار اٹی آسانی نا بابت تینا سلاہ و سوج آتے پیش کریر، کاروباری برادری حکومتی اصلاحات آ عملدرآمد اٹی کمکاری نا باوری کرفیر، کاروباری برادری ملکی شونداری ٹی زموارانہ کڑد ادا کننگ نا ہم باوری کرفیر ۔