وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ

اسلام آباد ۔ 03اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان جے یو آئی (ف) انا سروک مولانا فضل الرحمان ءِ پارینے کہ اِراسیاسی جماعت نے تینا جند انا فائدہ غاتے کن ندر کننگ خوارہ، بایدے دافتا ارادہ غاتے پہہ مر ، اسہ سیاسی نبض شناس اس الس نا نبض ءِ انتئے پہہ مفننگ اٹی ءِ، اوفتا تین پہ تینی بے اتفاقی داہیت انا شاہدی ءِ کہ دا تینا سیاسی فائدہ ٹی بیرہ مولانا نا کوپہ ءِ کاریم اٹ اتنگ خوارہ، مولانا صاحب ، الس اٹی نا است بڈی ہمو تم مننگ کیک ہراتم نی تینا توار ءِ مظلوم کشمیری تا حق اٹی بڑز کیس ۔ پنچ شنبے نادے ڈاکٹر فردوس عاشق اعوان تینا ٹویٹ اٹی پارے کہ کشمیر کمیٹی نا چیئرمین نا وڑاٹ پروٹوکول و مراعات آتا کڑز ءِ ادا کننگ نا وخت بسنے، اوداسہ تینا لوز آتا سم تا مون ءِ شدت پسند مودی نا کنڈاکے ۔ اوپارے کہ اپوزیشن سیاسی منافقت نا مثال اس جوڑ مسنے، مسلم لیگ ن و پی پی پی مولانا فضل الرحمان تون پدریسہ سیاست کننگ ءُ ۔ ڈاکٹر فردوس عاشق اعوان پارے کہ ہڑتوم آ جماعت آک مولانا نا کمک اٹ مدرسہ غاتا کودک و غیر سیاسی چناتے سیاسی فائدہ غاتا ایندھن جوڑ کننگ خوارہ ہراکہ است ہسونی اسے، ہڑتوم آ جماعت آک مولانا تون سلنگ نا خطرہ ہم ہلنگ خواپسہ، اسہ ایلو تون ہراراست پاننگ کپسہ او الس تون انت راست پارور ۔