وزیر توانائی عمر ایوب خان نا فرانسیسی سفیر تون اوڑدہی ٹی گپ و تران

اسلام آباد ۔ 03اکتوبر (اے پی پی) وزیر توانائی عمر ایوب خان پارینے کہ پاکستان اٹی پن بجلی نا بشخ اٹی زرکاری نا خاطر خواہ وارخواہی ساڑیءِ ، دریائے سندھ انا قدرتی ترند بہاءو ءِ کاریم اٹ اتسا نن ہزار آ میگاواٹ بجلی جوڑ کننگ کینہ ۔ داہیت ءِ وزیر توانائی عمر ایوب خان پاکستان اٹی متعین فرانس نا سفیر مارک بیریٹی تون اوڑدہی ٹی پارے ۔ بنجائی وزیر فرانس نا سفیر ءِ ملک اٹی پاور سیکٹر نا چندی پروجیکٹ آتا بابت معلومدار کرسا پارے کہ ملک اٹی پوسکن آ متبادل توانائی پالیسی اس جوڑ مننگ ءِ، ہرا 75 درسد توانائی ملکی وسیلہ غاتیان ودی کننگ نا کسر نا تعین ءِ کیک ۔ وزیر توانائی پارے کہ اڑزان و چاگڑد دوست توانائی نا پیدوار ءِ ودفنگ کن ملکی توانائی نا مکس اٹی متبادل توانائی نا ساڑی آ 4درسد بشخ ءِ 30 درسد اسکان اتنگک ۔ اوپارے کہ لاءف لائن صارف و لس بندغ ءِ کبینی نا بھاریم آن رکھ کننگ کن 300 یونٹ اسکان نا بجلی صارف آتے کن ہچ ءُ ودکی اس کننگتنے ۔ فرانسیسی سفیر مارک بیریٹی پارے کہ فرانس نا چندی کمپنی پاکستان اٹی توانائی بشخ اٹ کاریم کننگ ءُ ہرافتے ٹی اوچ ون و اوچ ٹو اٹی کاریم کروک آ این جی او و ٹوٹل سرفہرست ءُ ۔ اوپارے کہ فرانسیسی کمپنیک پاکستان اٹی توانائی نا بشخ ءِ خصوصی است خواہی اٹ ہُننگ ءُ و داڑے زرکاری کن متاماری کننگ ءُ ۔