اسلام آباد ۔ 03اکتوبر (اے پی پی) قومی احتساب بیورو نا چیئرمین جسٹس جاوید اقبال پارینے کہ پوریا گر تا خراج نا بابت مقدمہ غاتے ایف بی آر آ گدریفینہ ، غریب آتا خید خلنگ اٹ کٹیا کروک ارب آ روپئی تے پلسا پیشن نا ملک نروک آتے نیب ہچ ءُ حالیت اسے ٹی الیپک،سپریم کورٹ منی لانڈرنگ نا کیہی مقدمہ غاتے نیب آ گدریفینے، ریفرنس پورو جاست وپاست و انکوائری آن پد دائر کننگک، پاناما سکینڈل نا بابت ایلو کیس آک ہم چلینگ انگ ءُ ۔ داخیال آتا درشانی ءِ او پنچ شنبے نادے آ بنجا ایوان ہائے صنعت و واپار اٹی پوریا گر برادری و صنعت کار آتیان تران کرسا کرے ۔ اوپارے کہ دا ہوکاک چلینگارہ کہ نیب گام گیج آتیان پوریا گر برادری فریشان ءِ، نیب انا اسہ گام گیج اسے آن ہم پوریاگر آتے کن مشکلات ودی متنے و نئے مریک ۔ اوپارے کہ ہرافتے تون 1980ء ٹی ہچ اس الوکہ ولے اینو او دبئی ٹی پلازہ غاتا مالک ءُ ، اوفتے تون داپیسہ غاک ہراکان بسر ۔ اوپارے کہ نیب مقدمہ غاتا جاست وپاست اٹی ہچ کس نا عزت نفس ءِ مجروح کپک،عزت و شرف و وقار اٹ اوفتے نیب آ بٹنگ انگک ۔ ای جج انا حیثیت اٹ ہمیشہ خلقت نا ڈکھ آتا مداوا ءِ کرینٹ و داسہ ہم خلقت نا ڈکھ آتا مداوا ءِ کننگ نا کوشست کننگ اُٹ ۔ اوپارے کہ نیب اٹی مقدمہ غاتے بناکننگ و چٹفنگ آن مست اوفتا کانودی پہلو تیا سجفنگک ۔
