لاہور ۔ 03اکتوبر (اے پی پی) پاکستان تحریک انصاف نا سینئر مرکزی راہشون و مسکوہی بنجائی وزیر ہمایوں اختر خان پارینے کہ اپوزیشن نا حکومت ءِ نزور کننگ نا سلاہ اوفتا تینا لخ اٹ تمک، مسترد مروک سیاست دان تیان حکومت ءِ ہچ ءُ خطرہ اس اف، بلکن ہر پڑ اٹ سرسہبی اٹ پیش رفت برجاءِ، گچین پالیسی تا بھرمک زوت الس اسکان سرمننگ نا بناءِ کیرہ ۔ داخیال آتا درشانیءِ او پنچ شنبے نادے آ اوڑدہی کن بروک آ ڈل اتون گپ و تران کرسا کرے، ہمایوں اختر خان پارے کہ حکومت ءِ ہر دے ملوک آ سرسہبی تیان اپوزیشن نا غٹ اومیت آتے دیر دیک،و دا ولدا پوسکن آ چم تیکن کاٹم پہ کاٹم مریرہ، پاکستان نا برخلاف چم کروک آک بے سہب و بے مراد ہی مریرہ، اوپارے کہ حکومت ءِ مش کون آ ویل آک میرات اٹ ملار ولے اوکان پد ہم حالیت آتے ٹی دے پہ دے گچینی بننگ ءِ ہرانا سوب آن اپوزیشن لپڑزہ مسنے، گڈگورننس آ خصوصی چکار کننگانے ہرانا جم وڑاٹ مثبت بھرم مون آ بننگ ءِ ، ہمایوں اختر خان پارے کہ حکومت گروتھ ءِ ودفنگ کن انڈسٹری نا شونداری کن کاریم کننگ ءِ، ملک اٹی بھلا مشینری تا امپورٹ بناکرینے، و بروک آ منہ تُو اٹی بیرہ ننا گروتھ ودک بلکن روزگار نا پوسکن ءُ وارخواہی ہم ودی مریک، زرکارآتے چکنگ کن ہم پالیسی اس جوڑ کننگانے ہراڑان تہہ و پیشن نا ملک آتیان زرکاری نا رجحان اٹی ودکی مننگ ءِ ۔
