وزیراعظم اقوام متحدہ نا جنرل اسمبلی آن تران اٹی نئے بیرہ قوم بلکن ملت اسلامیہ نا نمائندگی ءِ کننگ نا حق ءِ ادا کرینے، ڈاکٹر راغب حسین نعیمی

اسلام آباد ۔ 03اکتوبر (اے پی پی) پنی آ عالم دین و جامعہ نعیمیہ لاہور نا سروک ڈاکٹر راغب حسین نعیمی پارینے کہ وزیراعظم عمران خان اقوام متحدہ ٹی تران نا وخت آتحفظ ناموس رسالت ﷺ نا سرحال و کشمیر نا ویل انا بابت جہانی ضمیر ءِ سرفنگ نا کوشست کرے ۔ ’’اے پی پی‘‘ تون گپ و تران کرسا اوپارے کہ وزیراعظم بھاز جوان ءِ تقریر اس کرے و دیکی آ پیدوار کرے کہ مسلمانک نبی اکرم ﷺ نا عزت ، وقار و ناموس آ ہچ وڑاسے ٹی چپ سلپسہ، وزیراعظم کشمیر نا بابت ہم جیرتی موقف اس تینا کرے ولے داسہ عملی گام گیج آتا گرج ءِ ۔ اوپارے کہ کشمیر پاکستان نا شہ رگ ءِ ، داویل آ پاکستان نا غٹ جماعت و مچ آ قوم انا موقف اسٹ ءِ، داسہ گرج داہیت انا ءِ کہ دا ویل آ امنائی عملی وڑاٹ ہم نظر برے ۔ ڈاکٹر راغب نعیمی پارے کہ کنے ملک اٹی تحفظ ناموس رسالت کانود اٹی ترمیم یا بدلی نا ہچ ءُ کوشست اس نظر بفننگ ءِ ، ہنداخاطران داوڑنا گڑاس اگہ تالان کننگ انگ ءِ تو او غلط ءِ ۔ وزیراعظم نا تحفظ ناموس رسالت نا بابت دوٹوک موقف ننا مون آٹے ۔ وزیراعظم اقوام متحدہ نا جنرل اسمبلی آن تران اٹی دامعاملہ غا نئے بیرہ قوم بلکن ملت اسلامیہ نا نمائندگی ءِ کننگ نا حق ءِ ادا کرینے ۔