اسلام آباد ۔ 2 اکتوبر (اے پی پی) مزن وزیر عمران خان ءَ گوں ملائیشیا ءِ پارلیمنٹ ءِ سپیکر محمد عارف بن محمد یوسف ءَ چار شمبے ءِ روچ ءَ اسلام آباد ءَ گند ءُُ نند کت ۔ مزن وزیر عمران خان ءَ کشمیر ءِ جیڈھ ءِ گیواری ءَ واستہ اقوام ءِ متحدہ ءِ چارٹر ءُُ یو این سیکورٹی کونسل ءِ منوگری آنی رد ءَ ملائیشیا ءِ مزن وزیر مہاتیر محمد ءِ بیان ءَ را ساڑات ۔ آئی ءَ گوشت کہ مزن وزیر مہاتیر محمد مسلم دگنیا ءُُ دیمروئی کنوکیں ملک آنی واستہ یک بے دروریں نمونگ ات ۔ آئی ءَ دویں ملک آنی نیام ءَ یکوئی آناں گیش مھکم کنگ ءِ جزم ءِ درشان کت ۔ آئی ءَ گوشت کہ پاکستان ءَ سیل ءُُ سوادی شوبگ ءِ دیمروئی ءَ ھوار دوئیں ملک آنی نیام ءَ دو نیمگی تجارت ءُُ سرمایہ کاری ءَ را گیش ودینگ ءِ گنجاشک است انت ۔ مزن وزیر ءَ ملائیشیا ءِ پارلیمنٹ ءِ سپیکر محمد عارف بن محمد یوسف ءَ را بھارتی مقبوضہ کشمیر ءِ استیں جاور ھال آنی بابت ءَ سرپد کت ۔ آئی ءَ گوشت کہ بھارتی گیر کانودی گامگیج آنی سبب ءَ چہ پڑ ءِ سیکورٹی جاور نہ وش انت ۔ آئی ءَ گوشت کہ بھارت میاں اوستمانی کانود ءُُ یو این سیکورٹی کونسل ءِ منوگری آنی ھلاپ ءَ کنگ ءَ انت ۔

متعلقہ مضامینمصنف کی طرف سے مزید