اسلام آباد ۔ 2 اکتوبر (اے پی پی) مزن وزیر عمران خان ءَ گوشت کہ وانگ ءُُ زانگ ءَ چہ دوری ءِ سبب ءَ چہ مسلمان سرگردانی یے آماچ بنت، استیں وانگ ءُُ زانگی نظام ءِ سبب ءَ گیشتر دیم ءَ اتک نہ کن انتت، ملک ءَ سئے رنگ ءِ زانشتی رپک چلگ ءَ انت، یک رنگی زانشتی نظام المی انت، ھمک تبک ءِ مردم آنی جتا جتائیں زانشتی نظام ءَ را ھلاس کناں ، مدرسہ آنی نودربر آناں ھم نوکیں زمانگ ءِ زانشت ءِ وسیلگ ءَ چہ دیم ءَ آیگ ءِ موہ ءَ دیاں ، مرچی ھمک جاھ ءَ مسلمان کوشگ بوھگ ءَ انت، مقبوضہ کشمیر ءَ 80لکھ مردم آناں جیل ءَ بندی کنگ بوتگ ۔ پاکستان ، ترکی ءُُ ملائیشیا مسلمان آنی راجدپتر ءُُ بن گپ ءَ را دگنیا ءِ دیم ءَ پیش کنگ ءِ واستہ ٹی وی چینل بنگیج کن اَنت ۔ آئی ءَ اے ھیالانی درشانی چارشمبے ءِ روچ ءَ اداس وزارت ءِ وانگ ءُُ زانگ ءِ چیر دستی ءَ دینی مدرسہ آنی نودربر آناں داد ءِ بھر ءُُ بانگ ءِ مراگش ءَ گوں گشتانک ءِ ساھت ءَ کت ۔ اے موہ ءِ سر ءَ بنجاھی وزیر برائے وانگ ءُُ زانگ ءُُ کزبی کار شفقت محمود ، بنجاھی وزیر نیک راھی کار نورالحق قادری، بنجاھی وزیر توکی کار سید اعجاز شاہ ءُُ مزن وزیر ءِ ھاسیں کمکار نعیم الحق ھم ساڑی اتنت ۔ مزن وزیر ءَ گوشت کہ بنی پاک ﷺ ءَ درستاں چہ گیش زانشت ءِ در جنگ ءِ سسر ءَ زور دتگ ۔ بنی پاک ﷺ ءَ گوشتگ کہ زانشت ءِ در جنگ ءَ چین ءَ روگ کپ ایت بہ رو ، چیا کہ آئی ءَ زانتگ کہ زانشت ءَ ابید چاگرد دیمروئی کت نہ کنت، 700سال ءَ تاں دگنیا ءِ نامداریں سائنسدان مسلمان بوتگ انت، مسلمان آں تلوار ءِ وجہ ناں بلکینگ ءَ زانشت ءِ سبب ءَ دیمروئی کتگ ۔ ایشی ءَ چہ پیسر مزن وزیر ءَ جتا جتائیں چکاس آنی تہ ءَ جوانیں کار کرد ءِ در جنوکیں مدرسہ ءِ نودربر آناں داد بھر ءُُ بانگ کت ۔
