وزیراعظم نا سرکاری ادارہ غاتے ٹی خذمت آتا فراوانی ٹی ہرے آ گڑتی نا درشان، بنجائی وزارت، ڈویژن و اوفتا ماتحت ادارہ غاتے کن پارت نامہ جاری

گچین کارکڑد نشان تفننگ آ آفیسر آتا برخلاف محکمانہ کارروائی کننگک، بنجائی وزیر آک و وزیراعلاک پارت آتیا عملدرآمد نا سخت چاروکی ءِ کیر، وزیراعظم عمران خان نا پارت
اسلام آباد۔ 01اکتوبر (اے پی پی) وزیراعظم عمران خان بنجائی وزارت، ڈویژن و ماتحت ادارہ غاتے ٹی خذمت آتا فراوانی ٹی ہرے آ گڑتی نا درشانی ءِ کرسا غٹ بنجائی وزارت، ڈویژنز، ماتحت ادارہ، صوبائی حکومت و اوفتا ماتحت ادارہ، فیلڈ فارمیشنز ءِ لیسن، این او سی، ڈومیسائل نا و ایلو پدسلوک درخواست آتے 4ہفتہ ٹی چٹفنگ، السی درخواست آتیا پیش رفت نا سرجم آتے ویب سائٹ آ اپ لوڈ و نوٹس بورڈ آ خلنگ نا پارت کرینے۔ وزیراعظم سیکرٹریٹ آن جاری مروک آ پارت نامہ نا رداٹ وزیراعظم عمران خان چندی وزارت، ماتحت ادارہ غاتے ٹی خذمت آتے کن ملوک آ درخواست آتا بے المی التواء گوجالنگ و دا درخواست آتیا وخت آ المی کارروائی کپننگ نا نوٹسءِ ہلکونے۔ مندرجہ بالا کارروائی غٹ بنجائی وزارت آتا کنڈآن پورو کننگ آن پد چار ہفتہ غاتیان پد وزیراعظم ءِ پیش کننگک وخت اس کہ صوبائی حکومت آک تعلقدار محکمہ غاتا سروک آتیان پک کننگ آن پد وزیراعلیٰ تے پیش کیرہ ہراٹی چیف سیکرٹریز، فیلڈ فارمیشنز، ادارہ غاتا سروک آک داہیت ءِ المی کیرہ کہ غٹ پدسلوک خذمت آتا فراوانی ہرافتے ٹی درخواست آک، اپیل آک، ریفرنس آتیا کارروائی پورو مسنے۔ وزیراعظم عمران خان تعلقدار محکمہ غاتیا الس نا پت انا بحالی کن دااست خواہی نا درشانی ءِ کرینے کہ مندرجہ بالا غٹ ادارہ غاک زیات آن زیات کاریم ءِ چنکو وخت اسے ٹی پورو کیر و اوفتے تعلقدار ادارہ نا ویب سائٹ آ اپ لوڈ و نوٹس بورڈ آ 10 دے انا تہہ ٹی خلیر تانکہ شاری تے تینا مشکلات و فریشانی تا ایسری کن کروک آ گام گیج آتا علم مننگ کے۔ اگہ ویل اسے نا نوعیت نا رداٹ تخوک آ وخت اٹی ایسر مننگ کپک و درخواست گزار شاری تے ہردے مروک آ تاخیر و پیش رفت نا بارواٹ نوشتہی وڑاٹ معلومدار کننگے۔ پارت نامہ ٹی پاننگانے کہ غٹ بنجائی سیکرٹریز چیف سیکرٹریز و ادارہ غاتا سروک آک آخبتی وڑاٹ دا عمل نا چاروکی ءِ کیرہ و داپرمان تے مون آ تخسا ایسر مروک آ کیس آتا سہ ماہی رپورٹ اس وزیراعظم آفس و وزیراعلیٰ آفس ءِ گدریفنگ نا پابند مریرہ۔ اوفتا سالانہ کارکڑدگی نا ریکارڈ اٹی دا کارکڑدگی نا اندراج کننگک ہرا آفیسر آتا جون کارکڑدگی مفک اوفتا سالانہ کارکڑدگی آ منفی زہم تمک و اوفتا برخلاف محکمانہ کارروائی ہم کننگک۔ بنجائی وزراء و وزیراعلیٰ تے پاننگانے کہ او مندرجہ بالا پارت آتیا عملدرآمد نا عمل نا سخت چاروکی ءِ کیر تانکہ ملک اٹی گچین طرز حکمرانی ءِ مون آ درسا الس ءِ زیات آن زیات آسراتی فراوان کننگ مرے۔ پارت نامہ نا رداٹ وزیراعلیٰ تے پاننگانے کہ او پارت نامہ غا عملدرآمد نا بابت تینا تعلقدار صوبہ غاتا کارکڑدگی آن وزیراعظم ءِ پورو وڑاٹ معلومدار کیر۔