ملائیشیا نا ایوان نمائندگان نا اسپیکر محمد عارف بن محمد یوسف نا اسپیکر قومی اسمبلی اسد قیصر تون اوردہی ٹی گپ وتران

اسلام آباد۔ 01اکتوبر (اے پی پی) ملائیشیا نا ایوان نمائندگان نا اسپیکر محمد عارف بن محمد یوسف تینا ڈل اتون اوار پارلیمنٹ ہاؤ س اٹی سے شنبے نادے اسپیکر قومی اسمبلی اسد قیصر تون اوڑدہی کرے ہراٹی ہڑتوم آ کنڈآتا تعلقداری، کشمیر نا ساڑی حالیت آتیا گپ و تران کننگا۔ داوخت آ اسپیکر ملائیشیا نا ڈل اتون گپ و تران کرسا پارے کہ بھارت کشمیر نا آئینی حیثیت ءِ بدل کرسا ڈیہہ ءِ پوسکن آ خطرہ غاتے ٹی بٹینے۔ مقبوضہ جموں کشمیر اٹی کرفیو نا 57می دے ءِ۔ کشمیر اٹی زند پورو وڑاٹ یند ءِ۔ کشمیر نا ویل اسہ متنازعہ ءُ ویل اسے۔ کشمیر نا ویل سلامتی کونسل نا قرارداد آتا رداٹ بایدے ایسر مرے۔ اوپارے کہ پرامن ایسری ڈیہہ ٹی پائیدار امن کن المی ءِ۔ بھارت کشمیر اٹی انسانی حق آتا سنگین خلاف ورزی ءِ کننگ ءِ۔ اوپارے کہ آر ایس ایس نا پیروکار حکومت بھارت اٹی اقلیت آتیا ڈغار ءِ تنک کرینے۔ مقبوضہ جموں و کشمیر اٹی بھارتی فوج انا بربریت ظلم انا اسہ پوسکن ءُ داستان اس نوشتہ کننگ ءِ۔ اسد قیصر پارے کہ مقبوضہ دامان اٹی میڈیا غا پابندی خلوک ءِ۔ کرفیو آن علاقہ ٹی خور و دوائی تا بھاز کاختی ءِ۔ جہانی برادری کشمیر اٹی کرفیو نا دمدستی چٹفنگ کن کڑد ادا کے۔ اوپارے کہ ملائیشیا تون تینا برادرانہ و دوستانہ تعلقداری تے بھاز اہمیت ایتنہ۔ پاکستان ملائیشیا تون زرکاری و ایلو بشخ آتے ٹی کمکاری ءِ مون آ دننگ خواہک۔ پاکستان ڈیہہ نا امن و شونداری کن ہمسایہ ملک آتون خوشگوار تعلقداری تا خواہندار ءِ۔ اوپارے کہ ملائیشیا نا وزیراعظم مہاتیر محمد نا اقوام متحدہ نا جنرل اسمبلی ٹی کشمیری الس نامخ تفی ٹی بیان ستاکڑزک۔ پاکستان ملائیشیا و ترکی نا کنڈآن اسلاموفوبیہ نا تدارک کن اسیجا ٹی وی چینل نا قیام نا فیصلہ ستاکڑزک۔ اسپیکر قومی اسمبلی پارے کہ پاکستان و ملائیشیا نا پارلیمان تا نیام اٹ خڑکی رابطہ ہڑتوم آ ملک آتا پارلیمنٹ نا باسک آتے اسہ ایلو نا آزموندہ غاتیان فائدہ ہرفنگ نا وارخواہی فراوان کیک۔ داوخت آ ملائیشین اسپیکر پارے کہ ملائیشیا پاکستان تون تینا برادرانہ تعلقداری تے پین سوگو کننگ نا خواہندار ءِ۔ ملائیشیا پاکستان تون غٹ بشخ آتے ٹی کمکاری ءِ پین مون آ دننگ خواہک۔