پاک بحریہ نا سروک ایڈمرل ظفر محمود عباسی تون آسٹریلیا نا ہائی کمشنر ڈاکٹر جیف شانا اوڑدہی، دفاعی شریداری آ گپ و تران

اسلام آباد۔ 01اکتوبر (اے پی پی) پاک بحریہ نا سروک ایڈمرل ظفر محمود عباسی تون آسٹریلیا ناہائی کمشنر ڈاکٹر جیف شا اوڑدہی کرے ہراٹی کسبی معاملہ و تین پہ تینی دفاعی شریداری آ سرجم گپ و تران کننگا۔ ترجمان پاک بحریہ نا رداٹ پاک بحریہ نا سروک ڈیہہ ٹی امن نا چرجوئی ٹی پاک بحریہ نا کڑد ءِ مون آتخا۔ آسٹریلیا نا ہائی کمشنر ڈیہہ ٹی امن و سوگوی ءِ المی کننگ اٹ پاک بحریہ نا کڑد انا ستاءِ کرے۔