زمی جمب اٹی تپاخت کروک آ بندغ آتاخاہوت آتے مالی امداد نا فراوانی آن زمی جمب نا زہمی تا بحالی ٹی کمک رسینگک، ڈاکٹر فردوس عاشق اعوان

اسلام آباد۔ 01اکتوبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ تپاخت کروک آ بندغ آتا خاہوت آتے مالی امداد نا فراوانی آن زمی جمب نا زہمی تا بحالی ٹی کمک رسینگک، اُرا، مال و ساہدار تیکن زرتلافی آن زہمی تا نسخان تا ازالہ مننگ کیک، زہمی علاقہ غاتے ٹی چناتا تعلیم نا چرجوئی ءِ برجاتخنگ کن خصوصی گام گیج کننگ انگ ءِ، زالبول آتا آسراتی کن ہم گام گیج کننگانے۔ سے شنبے نادے آ تینا ٹویٹ اٹی اوپارے کہ وزیراعظم عمران خان نا دورہ غان زمی جمب آن زہمی کشمیری الس ءِ پوسکن ءُ حوصلہ اس ملانے، اوفتا امداد و بحالی اسکان کمک نا چرجوئی پبی وڑاٹ برجاسلک۔ اوپارے کہ بنجائی حکومت تپاخت کروک آ تاخاہوت آتے 5لکھ روپئی فی کس ایتک، پورو بھس مروک آ ہند آتے کن 2لکھ وخت اس کہ جزوی وڑاٹ زہمی مروک آ ہند آتا معاوضہ 1لکھ روپئی تننگک۔ اوپارے کہ 38 اسکول آتے کن بھلو ٹینٹ تننگ انگ ءِ، زمی جمب آن زہمی مروک آ روڈ آتا جوڑ کننگ پنجاب حکومت نازمواری مریک، ٹھپی تا کمک کن پاکستان بیت المال ہم تینا بشخ ءِ شاغک، زہمی تا بحالی اسکان آرام اٹ تولپنہ۔ اوپارے کہ زمی جمب آن زہمی علاقہ غاتے ٹی انفراسٹرکچر نا بحالی نا کساس ءِ 1200 ملین خلکونن۔ زمی جمب اٹی پوریاگر برادری ءِ 50 ہزار روپئی فی دوکان وخت اس کہ جزوی وڑاٹ زہمی مروک آ دوکان نا مالک ءِ 25ہزار روپئی تننگک، حکومت 50 ہزار روپئی فی ساہدار کمک فراوان کیک۔