وزیراعظم عمران خان نا آزاد کشمیر نا زمی جمب آن زہمی علاقہ غاتا دورہءِ کننگ نا وخت آ گپ و تران

حکومت زہمی تا بحالی کن پیکج ا س جوڑ کننگ ءِ
امدادی سرجز آتا جاچ ءِ ہلک، زیر علاج زمی جمب نا زہمی تا جان پڑسی ءِ کرے
میر پور۔ 30 ستمبر (اے پی پی) وزیراعظم عمران خان پارینے کہ اونا حکومت آزاد کشمیر اٹی زمی جمب نا زہمی تا بحالی کن پیکج اس جوڑ کننگ ءِ و دارداٹ دمدستی وہروڑ گام گیج کننگک۔ وزیراعظم عمران خان دوشنبے نادے آ آزاد کشمیر نا زمی جمب آن زہمی علاقہ میر پور نا دورہ ءِ کرے و امدادی سرجز آتا جاچءِ ہلک۔ اودے زہمی علاقہ ٹی مروک آ ریسکیو، ریلیف و بحالی نا گام گیج آتیان معلومدار کرے۔ وزیراعظم ءِ ہیلی پیڈ آ سرمننگ آ این ڈی ایم اے نا کنڈآن زمی جمب آن زہمی علاقہ غاتے ٹی مروک آ ریسکیو، ریلیف و بحالی نا بابت ہرفوک آ گام گیج آتا بارواٹ حوال تننگا۔ اوکان پد وزیراعظم ڈویژنل ہیڈ کوارٹر ٹیچنگ ہسپتال میر پور اٹی زیر علاج زمی جمب نا زہمی تا جان پڑسی ءِ کرے۔ داوخت آ گپ و تران کرسا وزیراعظم پارے کہ ای اقوام متحدہ ٹی ئسٹ تو زمی جمب انا معلوم مس و ای بھاز افسوز کریٹ۔ ای دمدستی وڑاٹ داجاگہ نا دورہ ءِ کننگ خواہسوٹہ ولے امریکہ غان پدی بننگ اٹ ہرے مس۔ اوپارے کہ کنے زمی جمب اٹی مروک آ جانی و مالی نسخان آ آزاد کشمیر و میر پور نا مخلوق تون دلی ہمدردی ءِ۔ ای اوفتا ڈکھ ءِ محسوس کننگ کیوہ۔ حکومت زہمی تا بحالی کن اسہ پیکج اس جوڑ کننگ ءِ و دارداٹ ہروڑ و دمدستی گام گیج کننگک۔داوخت آ وزیراعظم آزاد جموں و کشمیر راجہ فاروق حیدر اقوام متحدہ نا جنرل اسمبلی ٹی کشمیر نا ویل ءِ جوان وڑاٹ تالان کننگ آ وزیراعظم نا منت واری ءِ ہرفے و پارے کہ وزیراعظم اوفتا توار ءِ ہموڑے ہرفینے۔ اوپارے کہ نن زمی جمب آن زہمی علاقہ غاتے ٹی امداد و بحالی نا سرجزآتے کن ہروڑنا کوشست کننگ اُن و مالی امداد کن درخواست کرینن۔ اوپارے کہ تعمیراتی قاعدہ غا سختی اٹ عمل کننگک۔ داوخت آ وزیراعظم آزاد کشمیر راجہ فاروق حیدر، وزیرخارجہ شاہ محمود قریشی، بنجائی وزیر امور کشمیر علی امین گنڈاپور، چیئرمین این ڈی ایم اے لیفٹیننٹ جنرل محمد افضل، پاکستان تحریک انصاف آزاد کشمیر نا صدر بیرسٹر سلطان محمود چوہدری و تحریک انصاف نا چیف آرگنائزر سیف اللہ نیازی ئسک ہم اوڑتون اوار ئسر۔ آزاد جموں و کشمیر نا چیف سیکرٹری وزیراعظم عمران خان ءِ زمی جمب آن مروک آ نسخان تا بارواٹ سرجم حوال تس۔