میر پور، وزیراعظم عمران خان ءِ آزاد کشمیر اٹی زمی جمب آن مروک آ نسخان تا بارواٹ سرجم حوال تننگا

میر پور۔ 30 ستمبر (اے پی پی) وزیراعظم عمران خان ءِ میر پور آزاد جموں وکشمیر اٹی زمی جمب آن مروک آ نسخان تا بارواٹ سرجم حوال تننگا۔ دوشنبے نادے آ میر پور آ بننگ آن پد آزاد جموں و کشمیر نا چیف سیکرٹری وزیراعظم ءِ زمی جمب آن مروک آ نسخان تا بارواٹ حوال تس۔ داوخت آ وزیراعظم آزاد کشمیر راجہ فاروق حیدر، وزیر خارجہ شاہ محمود قریشی، بنجائی وزیر امور کشمیر علی امین گنڈاپور، چیئرمین این ڈی ایم اے لیفٹیننٹ جنرل محمد افضل، پاکستان تحریک انصاف آزاد کشمیر نا صدر بیرسٹر سلطان محمود چوہدری، تحریک انصاف نا چیف آرگنائزر سیف اللہ نیازی ئسک ہم ساڑی ئسر۔ وزیراعظم ءِ پاننگاکہ 24ستمبر آ بروک آ ریکٹراسکیل آ زمی جمب نا شدت 5.8 ئس و داڑان آزاد جموں و کشمیر اٹی میر پور و بھمبر نا ضلع غاتے ٹی جاتلاں، یونین کونسل نادرا نا علاقہ غٹ آن زیات زہمی مس۔ 26ستمبر آ 4.4 شدت نا اسہ پین زمی جمب اس ہم بس۔ وزیراعظم ءِ پاننگاکہ زمی جمب آن کم و ود اسہ لکھ بندغ زہمی مسنو۔ نسخان تا سروے برجاءِ، بنائی رپورٹ نا رداٹ 38 بندغ تپاخت و 844ٹھپی مسنو ہرافتیان 107بھاز ٹھپی ءُ۔ 500 پکا انگا ہند آتے پورو وڑاٹ نسخان رسینگانے وخت اس کہ6500 پکا ہند جزوی وڑاٹ زہمی مسنو۔ 1200 کچہ انگا ہند آک پورو وڑاٹ بھس مسنو و 500 کچہ انگا ہند آک جزوی وڑاٹ زہمی مسنو۔ داکان بیدس 44ساہدار و 50 گاڈی ہم نسخان مسنو، معاوضہ نا بنائی کساس 63کروڑ 10 لکھ روپئی خلنگانے۔ حوال اٹی پاننگاکہ روڈ آتا شدید نسخان اسہ ارب 44کروڑ 30 لکھ روپئی، بجلی نا تنصیب آتے 4کروڑ روپئی، کشت وکشار ولائیو اسٹاک ءِ 5کروڑ 30 لکھ روپئی، جان جوڑی نا بشخ ءِ 7 کروڑ روپئی، تعلیم نا بشخ ءِ 10 کروڑ 30 لکھ روپئی، لوکل گورنمنٹ ءِ 5کروڑ 70 لکھ روپئی، فزیکل پلاننگ و ہاؤسنگ نا بشخ ءِ 75 کروڑ روپئی، جیل تے 20 کروڑ روپئی و جم اٹنگا نسخان تا کساس 2ارب 71کروڑ 60 لکھ روپئی خلنگانے وخت اس کہ اپرجہلم کینال ءِ مروک آ نسخان نا کساس ءِ پنجاب حکومت خلیک۔