ڈی جی (سویلی ایشیاء و سارک) ڈاکٹر محمد فیصل نا کنڈآن بھارتی ڈپٹی ہائی کمشنر نا دفترخارجہ غا طلبی، 28 و 29 اگست 2019ء آ لین آف کنٹرول (ایل او سی) آ جنگ بندی نا بے خار خلاف ورزی تا مذمت ءِ کرے

اسلام آباد۔ 30 ستمبر (اے پی پی) ڈائریکٹر جنرل (سویلی ایشیاء و سارک)ڈاکٹر محمد فیصل بھارتی ڈپٹی ہائی کمشنر گوراواہلووالیا ءِ دوشنبے نادے آ دفترخارجہ غا بٹنگا و 28 و 29 اگست 2019ء آ لین آف کنٹرول (ایل او سی) آ جنگ بندی نا بے خار خلاف ورزی تا مذمت ءِ کرے۔ دفترخارجہ آن جاری اسہ بیان اسے نا رداٹ ایل او سی نا نکیال و رکھ چکری سیکٹر آتے ٹی بھارتی فوج انا بے خار سم کاری ٹی 60 سالہ بزرگ زالبول سلامت بی بی و 13سال انا ذیشان ایوب شہید مسر وخت اس کہ نکیال سیکٹر اٹی اسہ زالبول اسے تون اوار مسہ شاری و رکھ چکری سیکٹر اٹی نیاڑی اس بھاز ٹھپی مس۔ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی ءِ کرسا آرٹلری، بھاری و خودکار سلہہ غاتاکمک اٹ لس شاری آبادی ءِ نشانہ کننگ ءِ۔ 2017ء ٹی بھارت 1,970 وار جنگ بندی نا خلاف ورزی تا ارتکاب کرے و داوخت اسکان جنگ بندی نا خلاف ورزی تا چرجوئی برجاءِ۔ ڈاکٹر فیصل پارے کہ دانستہ شاری آبادی ءِ شست کننگ بے کچ قابل افسوز، انسانی عظمت و وقار، جہانی انسانی حق و جہانی انسانی کانود ناصریحا منافی ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ سنگین خطرہ مون تروک ءِ ہراٹی سٹریٹجک غلطی نادروشم اٹ پیش تمنگ کیک۔ ڈائریکٹر جنرل (سویلی ایشیاء و سارک) بھارت آ زور شاغا کہ او 2003ء نا جنگ بندی معاہدہ نا پاسداری ءِ کے، جنگ بندی نا خلاف ورزی تا داواقعہ غاتا جاست وپاست ءِ کرفے۔ بھارتی فوج ءِ جنگ بندی ناشرف نا حکم ایتے، ایل او سی و ورکنگ باؤنڈری آ اونا روح انا رداٹ امن برقرار تخر۔ اوزور شاغا کہ اقوام متحدہ ناسلامتی کونسل نا قرارداد آتا رداٹ بھارت اقوام متحدہ نا فوجی مبصر (یو این ایم او جی آئی پی) ءِ تینا کڑد ءِ ادا کننگ نا موکل ایتے۔