ترک صدر طیب اردوان و چیف آف دی نیول اسٹاف ایڈمرل ظفر محمود عباسی پاک بحریہ کن تیار کروک آ پوسکن انگا و تباہ کن جنگی جہاز انا سٹیل کٹنگ کریر

اسلام آباد۔ 30 ستمبر (اے پی پی) پاک بحریہ کن تیار کروک آ پوسکن انگا و تباہ کن ملجم کلاس جنگی جہاز نااسٹیل کٹنگ نا دود ترکی نا شار استنبول نا نیول شپ یار ڈ اٹی مس، ترکی نا صدر طیب اردگان و چیف آف دی نیول اسٹاف ایڈمرل ظفر محمود عباسی اواری وڑاٹ سٹیل ءِ کٹنگ کریر۔ ترجمان پاک بحریہ نا رداٹ پاک بحریہ کن تیار کروک آ دا جہاز پوسکن انگا تباہ کن سلہہ و ٹیکنالوجی آن لیس ءِ۔ امیر البحر ایڈمرل ظفر محمود عباسی پارے کہ دا جہاز آتا پاک بحریہ ٹی اوار مننگ آن پاک بحریہ نا جنگی لائخی و ڈیہہ ٹی امن و سوگوی نا کچ اٹی ودکی مریک۔ اوپارے کہ سٹیل کٹنگ نا دود پاک ترک سنگتی نا تابندہ باب اسے و ہڑتوم آ ملک آتا نیام اٹ متکن آ سنگتی نا گچین ءُ مثال اسے۔ ترجمان پاک بحریہ نا رداٹ امیر البحرترکی نا وزارت قومی دفاع و ترکی نا اہم عہدیدارآتون اوڑدہی ہم کرے۔ نیول چیف ترک بحریہ نا دا اہم پروجیکٹ اٹی کمکاری آ منت واری ءِ ہرفے۔ ترک صدر پاکستان و ترکی نا برادران تعلقداری تے مثالی گوندا۔ سٹیل کٹنگ نا دود آن پد ترکش نیول فلیٹ اٹی چارمی ملجم کلاس جنگی جہاز نا اوار مننگ نا دود اس ہم اڈتننگا۔