وزیراعظم عمران خان نا نیویارک آن پدی بننگ آ اسلام آباد بالی پٹ آ بخیر کننگ کن بروک آتیان تران

اسلام آباد۔ 29ستمبر (اے پی پی) وزیراعظم عمران خان پارینے کہ مودی نا فاشٹ و مسلمان تیان خار کنوک آ حکومت ءِ دنیا نا ہر پلیٹ فارم آ بے نقاب کینہ، خرا ب انگا وخت اٹی اہل پاکستان مایوس مفس، کشمیر نا خلقت پاکستان نا کنڈاہُننگ ءُ، دنیا اوفتے تون سلے یا سلپئے پاکستان اوفتے تون سلوک ءِ، ہراوخت اسکان نن اوفتے تون سلوک اُن او تینا جہد اٹی ضرور سرسہب مریرہ و آجوئی ملک۔ یک شنبے نادے اقوام متحدہ نا جنرل اسمبلی ٹی تینا ولولہ انگیز و پراثر تاریخی تران آن پد وطن آ پدی بننگ آ نیو اسلام آباد بالی پٹ آ مچ آ ملک آن بروک آ تحریک انصاف نا کارندہ، سیاسی و مذہبی راہشونک اودے جم و جوش اٹ بخیر کریر۔ داوخت آ ایئر پورٹ نا چاگڑداٹی ”دیر بچفک پاکستان ءِ“ عمران خان عمران خان“کشمیر جوڑ مریک پاکستان“ نا نعرہ غاتا توار پناکہ، خیبر پختونخواہ نا گورنر شاہ فرمان، سندھ انا گورنر عمران اسماعیل، بنجائی و صوبائی وزیر آک، پارلیمنٹ نا باسک آک و صوبائی اسمبلی تا بھلو کچ اس ہم اونا بخیر کننگ کن ساڑی ئسر۔ وزیراعظم عمران خان بیابخیر کن بروک آ تیان تران کرسا پارے کہ او تینا قوم انا منت وار ءِ کہ ہرافک اقوام متحدہ ٹی کشمیری ہراکہ داوخت آ مشکل وخت اٹی ءُ اوفتا کیس ءِ پبی وڑاٹ پیش کننگ کن سرسہبی نا دعا کریر۔ اوپارے کہ او خاص وڑاٹ تینا اُرائی بشریٰ بیگم نا منت واری ءِ ہرفک ہرااوڑکن خصوصی دعا کرے۔ وزیراعظم پارے کہ نن کشمیری تتون سلوک اُن، دنیا اوفتے تون سلے یا سلپ پاکستان اوفتے تون سلوک ءِ۔ اوفتیا ہرا ظلم مننگ ءِ نن اوفتے تون اللہ نا خوشنودی و رضاکن سلوک اُن۔ وزیراعظم پارے کہ 80لکھ کشمیری تے ہندوستا ن نا فوج کرفیو ٹی بند کرینے۔ اوپارے کہ او قوم ءِ اسہ گڑاس سمجھنگ خوارہ کہ ہرا جہد مریک اوٹی نشیب و فراز برسا کیک، گچین و خراب وخت بریک کاہک، ولے خراب انگا وخت اٹ مایوس مفیرے، کشمیر نا خلقت پاکستان نا کنڈاہُننگ ءُ وخت اس کہ نم اوفتے تون سلوک اورے او دا جہد اٹ پدی مفسہ۔ او انشاء اللہ سرسہب مریرہ و اوفتے آجوئی ملک۔ وزیراعظم پارے کہ او اسہ وار ولدا قوم ءِ پاہک کہ ہراتم نم جہد کیرے تو اوٹی جوان و خراب وخت بریک ولے خراب وخت آن خلیپیرے، نم خلیرے تو کشمیر اٹی بزرگ، چنا، نیاڑی و ورناک نما کنڈا ہُننگ ءُ۔ وزیراعظم پارے کہ ای دا وعدہ ءِ کیوہ کہ ای تینے کشمیر نا سفیر گوندانٹ، ہنداخاطران ای مودی نا فاشٹ نا حکومت و مسلمان تیان خار کنوک حکومت ءِ ہر فورم آ دنیا نا مون آ بے نقاب کیوہ۔ وزیراعظم پارے کہ ہراکنتون 30 سال آن سفر نا سنگت ءِ اوفتے غٹ ءِ اسہ کلہو اسے کہ انسان کوشست کیک اودے سرسہبی اللہ ایتک۔